By Asbarez | Tuesday, 20 January 2015
ԵՐԵՒԱՆ, <<Ազատութիւն>>.– Գիւմրիի մէջ անգամ մը եւս համատարած եւ խոր սուգ տիրեց 20 Յունուարին, երբ Սուրբ Նշան եկեղեցւոյ մէջ տեղի ունեցաւ փոքրիկ Սերեոժա Աւետիսեանի հոգեհանգիստի արարողութիւնը:
Եկեղեցին մարդաշատ էր, գիւմրեցիները, տարբեր շրջաններու բնակիչներ, պաշտօնատարներ եկած էին վերջին հրաժեշտ տալու վեց ամսական փոքրիկին: Ներկայ էին վարչապետ Յովիկ Աբրահամեան, արտակարգ իրավիճակներու նախարար Արմէն Երիցեան, առողջապահութեան նախարար Արմէն Մուրադեան, կառավարութեան այլ անդամներ, պատգամաւորներ, Շիրակի մարզպետ Ֆելիքս Ցոլակեանը, Գիւմրիի քաղաքապետ Սամուէլ Բալասանեան եւ այլն:<<Հայաստանի նախագահ Սերժ Սարգսեանը եւ կառավարութիւնը կ՛անեն ամէն ինչ, որպէսզի գիւմրեցիների՝ Գիւմրու ոճրագործութիւնը բացայայտելու պահանջի իրականացման համար տեղի ունենայ առաւելագոյնս արդար դատավարութիւն>>, լրագրողներուն հետ ունեցած զրոյցին ընթացքին յայտնած է վարչապետ Աբրահամեան։ <<Հայաստանում է Ռուսաստանի քննչական կոմիտէի նախագահը, եւ այժմ քննութիւն է իրականացւում: Հայաստանի իշխանութիւնները՝ նախագահի գլխաւորութեամբ, ամէն ինչ անում են, որպէսզի մեր ժողովրդի պահանջն ու խնդրանքն ի կատար ածուի: Տեղի ունեցածը մեզ համար մեծ դժբախտութիւն է, եւ Աւետիսեանների կորուստը մեծ է մեր ժողովրդի համար>>, դիտել տուած է վարչապետը:
Հոգեհանգստեան կարգը մատուցած, Շիրակի թեմի առաջնորդ Միքայէլ եպիսկոպոս Աջապահեան իր խօսքին մէջ նշած է. <<Խորն էր ու ծանր էր վէրքը, որի դիմաց այս մանուկը պայքարեց տղամարդու տոկունութեամբ: Երկնքում աւելացաւ եւս մէկ հրեշտակ: Աստուած այնպէս տնօրինեց, որ ինքը միանայ իր ընտանիքին, եւ այսօր Աւետիսեան ընտանիքը խաղաղութեան մէջ է>>։
Ան կոչ ուղղած է բոլորին՝ վիշտը տանելու լուռ աղօթքով եւ առանց ցնցումներու: <<Սերեոժան 7րդ զոհն էր, 8րդ զոհը չպէտք է լինի: Ոչ մէկի ձայնը չպէտք է բարձրանայ, առաւել եւս ձեռքը: Մենք բոլորին պէտք է ցոյց տանք, որ հզօր ժողովուրդ ենք, ինչը ապացուցեցինք վերջին օրերին: Սա համազագային ողբերգութիւն էր եւ սրանով պէտք է փակենք ողբերգութեան այս էջը>>, յայտնած է Աջապահեան՝ համոզմունք յայտնելով այն մասին, որ մեղաւորները պիտի կրեն իրենց պատիժը:
21 Յունուարին Սերեոժայի յուղարկաւորութիւնը տեղի ունեցաւ Շիրակի գերեզմանատան մէջ եւ վերջնական հանգիստ գտաւ ընտանիքի միւս վեց անդամներուն կողքին։
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ