ՊԷՅՐՈՒԹ, <<Ազդակ>>.- Իսրայէլեան օդուժը Յունուար 28ին երկու յարձակում գործեց Քընէյթրայի Թալ Շահմ շրջանին մօտ գտնուող սուրիական բանակին պատկանող երկու դիրքերուն վրայ։ Մարդկային վնասներ չեն արձանագրուած, սակայն քանդուած է 122 միլիմեթրնոց հրետանի մը՝ իր զինամթերքով միասին։

Իսրայէլեան բանակի բանբեր Աւիխա Ատրահի յայտնեց, որ յարձակումը տեղի ունեցած է կէս գիշերէն ետք, իբրեւ հակադարձութիւն բռնագրաւեալ Կոլանի դէմ երկու հրթիռներու արձակման։ Իսրայէլի ներքին գործոց նախարար Մոշէ Եաալոն իր կարգին նշեց, որ իսրայէլեան օդուժի սոյն յարձակումը <<յստակ պատգամ մըն է, թէ՝ պիտի չհանդուրժենք մեր ուղղութեամբ կրակոց եւ մեր գերիշխանութեան որեւէ ոտնահարումի պիտի հակադարձենք ուժգին ու խիստ կերպով>>։

Աւելի ուշ, <<Հըզպալլա>> Մազարեհ Շեպաայի մէջ թիրախ դարձուց 9 իսրայէլեան զրահապատներ: Ըստ <<Հըզպալլա>>ի՝ այս գործողութեան պատճառով, իսրայէլեան ուժերու շարքերուն մէջ արձանագրուած են 15 զոհեր եւ վիրաւորներ, սակայն իսրայէլեան բանակին համաձայն՝ միայն 2 զինուոր սպաննուած է։

Գործողութենէն ժամ մը ետք, <<Հըզպալլա>> ստանձնեց անոր պատասխանատուութիւնը՝ նշելով, որ անիկա Քընէյթրայի գործողութեան պատասխանն է:
Իսրայէլեան ուժերը թնդանօթներով ռմբակոծեցին հարաւային Լիբանանը, յատկապէս՝ Ապպասիէի մզկիթը: Իսրայէլեան ռմբակոծումներուն պատճառով սպաննուեցաւ նաեւ ՄԱԿի խաղաղապահ ուժերնէն սպանացի զինուոր մը:

<<Հըզպալլա>>, իր կարգին, ռմբակոծեց իսրայէլեան Ռամթա շրջանը, իսկ Սաֆատ շրջանի քաղաքապետարանը ապաստանարաններ բաց յայտարարեց եւ իսրայէլեան բնակեցման վայրերու բնակիչներէն խնդրեց օգտագործել զանոնք: