By Asbarez | Wednesday, 11 February 2015
ԳԱՀԻՐԷ, <<Ռոյթըրզ>>.- Եգիպտոսի նախագահ Ապտըլ Ֆաթթահ Սիսի եւ Ռուսիոյ նախագահ Վլատիմիր Փութին շարք մը համաձայնութիւններ գոյացուցին՝ վստահեցնելով, որ երկկողմանի յարաբերութիւնները <<բարձրացած են նոր մակարդակի>>:
Եգիպտոսի նախագահը, իր ռուս պաշտօնակիցին հետ տրուած միացեալ մամլոյ ասուլիսին ընթացքին յայտնեց, որ Փետրուար 10ին Գահիրէ այցելած Փութինին հետ իր հանդիպման ընթացքին, արծարծած է երկկողմանի յարաբերութիւններուն վերաբերող տարբեր հարցեր եւ վերահաստատած երկու երկիրներուն միջեւ <<ռազմավարական յարաբերութեանց անշեղ սկզբունքները>>, ինչպէս նաեւ Ռուսիան եւ Եգիպտոսը հետաքրքրող միջազգային հարցերու շուրջ հանդիպումները շարունակելու կարեւորութիւնը: Ան ըսաւ. <<Եգիպտոս Ռուսիան կը նկատէ ռազմավարական բարեկամ մը եւ իսկական դաշնակից մը>>: Սիսի նաեւ նշեց, թէ իր պաշտօնակիցին հետ համաձայնած է Եմէնի մէջ տեղւոյն տագնապին արագ լուծման աջակցելու, ինչպէս նաեւ Լիպիոյ եւ Իրաքի հողային ամբողջականութիւնը պահպանելու շուրջ:
Եգիպտոսի նախագահը աւելցուց, որ քննարկուած հարցերու շարքին էին ներկայ պայմաններու լոյսին տակ երկու երկիրներուն միջեւ զինուորական գործակցութեան, ինչպէս նաեւ երկու երկիրներուն միջեւ տնտեսական եւ առեւտրական մարզերուն մէջ համագործակցութեան սերտացումը: Ան ըսաւ, որ համաձայնութիւն գոյացած է երկու երկիրներուն միջեւ ազատ առեւտուրի գօտի ստեղծելու, ինչպէս նաեւ ուժանիւթի եւ հիւլէական ուժանիւթի խաղաղ օգտագործման մարզերուն մէջ համագործակցելու շուրջ:
Ռուսիոյ նախագահը իր կարգին յայտնեց. <<Սուրիական ճգնաժամին համար քաղաքական լուծումի մը գոյացման կարեւորութիւնը շեշտեցինք, եւ ճգնաժամի լուծման օժանդակելու համար՝ Մոսկուայի մէջ սուրիական բանակցութեանց նոր հանգրուան մը կը նախատեսենք>>, աւելցնելով, որ ինք Սիսիին ներկայացուցած է Մոսկուայի մէջ սուրիական կառավարական եւ ընդդիմադիր կողմերուն միջեւ բանակցութեանց մանրամասնութիւնները: Փութին նաեւ ըսաւ, որ Եգիպտոսի մէջ հիւլէական կայան մը կառուցելու շուրջ նախնական համաձայնութիւն մը գոյացած է:
Նշենք, որ Խորհրդային Միութեան տարրանջատումէն ետք, Փութին Ռուսիոյ առաջին նախագահն է, որ Եգիպտոս կ՛այցելէ:
Փութին այս այցելութեան առիթով Սիսիին նուիրեց <<Քալաշնիքոֆ>> տիպի գնդացիր մը եւ Եգիպտոսի նախագահը պաշտօնապէս հրաւիրեց Ռուսիա՝ երկու երկիրներուն միջեւ համագործակցութեան բանակցութիւնները շարունակելու համար:
Յայտնենք, որ Եգիպտոս կը ջանայ կապերը սերտացնել Եւրասիական տնտեսական միութեան հետ։
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ