ԵՐԵՒԱՆ, <<Նիուզ>> - ՄԱԿի մէջ Հայաստանի մնայուն ներկայացուցիչ Զոհրաբ Մնացականեան 11 Մարտին հանդիպում ունեցած է ՄԱԿի Ընդհանուր քարտուղար Պան Քի Մունի հետ։

Ողջունելով դեսպան Մնացականեանը՝ Պան Քի Մուն բարձր գնահատած է Հայաստանի աշխոյժ ներգրաւուածութիւնը միջազգային բազմակողմանի գործընթացներուն մէջ, ինչպէս նաեւ ՄԱԿի գրասենեակի աշխատանքներուն նկատմամբ ցուցաբերուող աջակցութիւնը:

Շնորհակալութիւն յայտնելով ընդունելութեան համար՝ դեսպանը գլխաւոր քարտուղարին փոխանցած է Հայոց Ցեղասպանութեան 100ամեակի համահայկական հռչակագիրի բովանդակութիւնը՝ թարգմանուած ՄԱԿի բոլոր պաշտօնական լեզուներուն՝ նշելով, որ Հռչակագիրը կը միտի ցեղասպանութեան դէմ համամարդկային պայքարի ամրապնդման ու զարգացման:

Դեսպան Մնացականեան ներկայացուցած է Հայոց Ցեղասպանութեան 100ամեակին նուիրուած նախաձեռնութիւնները՝ ընդգծելով անոնց կարեւորութիւնը ոճրագործութիւններու անթոյլատրելիութեան վկայակոչման եւ ցեղասպանութեան կանխարգիլման ուղղուած հետեւողական ջանքերու ամրապնդման առումով:

Դեսպան Մնացականեան բարձր գնահատած է ցեղասպանութեան կանխարգիլման առնչուող գործընթացներուն մէջ ՄԱԿի ա-ռանցքային դերակատարութիւնը՝ որպէս համամարդկային եւ բարոյական արժէքներու վրայ հիմնուած միջազգային կարեւորագոյն առաքելութիւնը ստանձնած կառոյց:

Զոհրաբ Մնացականեան Պան Քի Մունը տեղեկացուցած է նաեւ Հայոց Ցեղասպանութեան 100ամ-եակին նուիրուած <<100 Lives>> նախաձեռնութեան ծիրին մէջ 10 Մարտ 2015ին Նիւ Եորքի մէջ պաշտօնապէս ազդարարուած մարդասիրական <<Աւրորա>> մրցանակին մասին:

Հանդիպման ընթացքին զրուցակիցները միտքեր փոխանակած են տարածաշրջանային խնդիրներու եւ անոնց կարգաւորման կարելիութիւններուն մասին։

Անդրադարձ կատարուած է Լեռնային Ղարաբաղի հիմնախնդիրի խաղաղ կարգաւորման բանակցային գործընթացին:

ՄԱԿի Ընդհանուր քարտուղարը վերահաստատած է ՄԱԿի շարունակական աջակցութիւնը ԵԱՀԿ Մինսկի խումբի համանախագահութեան շրջագիծին մէջ եւ անոնց առաջարկներու հիման վրայ ղարաբաղեան հիմնախնդիրի կարգաւորման:

Դեսպան Մնացականեանի կողմէ ընդգծուած է վստահութեան ամրապնդման ուղղուած միջոցներու կարեւորութիւնը, մասնաւորապէս, շփման գիծին վրայէն արձակազէններու հեռացման, ինչպէս նաեւ զինադադարի խախտումներու հետաքննութեան մեքանիզմի ստեղծման վերաբերեալ համանախագահներու առաջարկները:

Դեսպան Մնացականեան մտահոգութիւն յայտնած է այն առնչութեամբ, որ համանախագահներուն կողմէ առաջարկուող այս միջոցները միշտ կը մերժուին Ատրպէյճանի կողմէ՝ ընդգծելով միջազգային հանրութեան կողմէ համապատասխան արձագանգի կարեւորութիւնը: