ԵՐԵՒԱՆ.– Հայ Յեղափոխական Դաշնակցութեան Գերագոյն մարմինի մամլոյ դիւանէն կը հաղորդեն, որ 17 Ապրիլին «Սիմոն Վրացեան» կեդրոնին մէջ ՀՅԴ Բիւրոյի քաղաքական ներկայացուցիչ Արմէն Ռուստամեան, ՀՅԴ ԳՄ ներկայացուցիչ Աղուան Վարդանեան, ՀՅԴ Բիւրոյի անդամ Կիրօ Մանոյեան, ՀՅԴ ԳՄ անդամ Լիլիթ Գալստեան եւ ՀՅԴ Երիտասարդական գրասենեակի պատասխանատու Սարգիս Մկրտչեան հանդիպում ունեցան Հայաստանի մէջ Միացեալ Նահանգներու դեսպան Ռիչըրտ Միլզի հետ:
Ողջունելով դեսպանը՝ Աղուան Վարդանեան ընդգծեց, որ կարեւոր է Հայաստան-Միացեալ Նահանգներ համակողմանի գործակցութեան խորացումը. ան յոյս յայտնեց, որ Միացեալ Նահանգներու նորանշանակ դեսպանը իր դրական նպաստը կը բերէ հայ-ամերիկեան յարաբերութիւններու ամրապնդման:
Վարդանեան ներկայացուց ՀՅԴի քաղաքական օրակարգն ու կուսակցութեան մօտեցումները՝ երկրի ներքաղաքական, արտաքին քաղաքական եւ ընկերային-տնտեսական խնդիրներու վերաբերեալ:
Դեսպանին խնդրանքով ՀՅԴ Բիւրոյի քաղաքական ներկայացուցիչ Արմէն Ռուստամեան անդրադարձաւ սահմանադրական բարեփոխումներու, տարածաշրջանային անվտանգութեան, որուն մէջ դրացի երկիրներու հետ ներկայ եւ կարելի յարաբերութիւններուն վերաբերող ՀՅԴի պատկերացումներուն եւ մօտեցումներուն:
ՀՅԴի ներկայացուցիչները կարեւոր նկատեցին Լեռնային Ղարաբաղի կարգաւորման գործընթացին մէջ Մինսկի խումբի ձեւաչափը՝ գնահատելով նաեւ այդ ուղղութեամբ Միացեալ Նահանգներու դերակատարութիւնը:
ՀՅԴի ներկայացուցիչները անդրադարձան սուրիական հակամարտութեան իբրեւ հետեւանք ստեղծուած մարդկային աղէտը դիմագրաւող հալէպահայ գաղութին եւ, առհասարակ, Սուրիոյ քրիստոնեայ բնակչութեան անվտանգութեան խնդիրներուն՝ ակնկալելով Միացեալ Նահանգներու կառավարութեան աջակցութիւնը տարածաշրջանին մէջ կայունութեան հաստատման եւ քրիստոնեայ բնակիչներուն ֆիզիքական անվտանգութեան ապահովման գործընթացներուն ուղղութեամբ:
Ամփոփելով հանդիպումը՝ դեսպան Միլզ յոյս յայտնեց, որ երկխօսութիւնը շարունակելի ըլլայ եւ նպաստէ երկու երկիրներու ընդհանուր շահերուն:
