ԵՐԵՒԱՆ, <<Արմէնփրէս>> -  ՄԱԿի Ընդհանուր ժողովի 70րդ նստաշրջանին մասնակցելու նպատակով Միացեալ Նահանգներ գտնուող Հայաստանի նախագահ Սերժ Սարգսեան 28 Սեպտեմբերին Նիւ Եորքի մէջ մասնակցած է ՄԱԿի խաղաղապահութեան նուիրուած գագաթնաժողովին, ուր նաեւ խօսք արտասանած է՝ դիտել տալով, որ, հակառակ միջազգային հանրութեան կողմէ զինեալ հակամարտութիւններու կանխարգիլման եւ անոնց խաղաղ կարգաւորման առնչուող մեծ ջանքերուն, խաղաղապահութիւնն ու անվտանգութիւնը կը շարունակեն մնալ փխրուն եւ խոցելի:

<<Ուրախութեամբ եմ նշում, որ չնայած մեր սահմաններին առկայ լարուածութեանը, Հայաստանի ներգրաւուածութիւնը միջազգային խաղաղապահութեան ոլորտում աստիճանաբար ընդլայնւում է թէ՛ աշխարհագրութեան, թէ՛ քանակական եւ թէ որակական իմաստով: Հայաստանն այսօր արդէն միջազգային խաղաղապահութեան եւ անվտանգութեան ակտիւ ներդրող է հանդիսանում՝ կուտակելով զգալի փորձ անցած տասնամեակի ընթացքում: 2004 թուականից հայ խաղաղապահները սկսել են ծառայութիւն իրականացրել Կոսովոյում, իսկ հետագայում նաեւ Իրաքում: 2010 թուականից մեր մասնակցութիւնը բերեցինք Աֆղանստանում անվտանգութեան աջակցման միջազգային ուժերին: 2015ից սկսած՝ այդ երկրում մասնակցում ենք <<Վճռական աջակցութիւն>> առաքելութեանը եւ, ինչպէս բազմիցս յայտարարել ենք, մեր միջազգային գործընկերների հետ մնալու ենք այնքան, որքան անհրաժեշտ է: Անցեալ տարի մենք ընդլայնեցինք խաղաղապահ առաքելութիւնում մեր ներգրաւուածութիւնը: Այժմ արդէն ներկայ ենք Լիբանանում տեղակայուած Մակի ԵՈԻՆԻՖԻԼ առաքելութիւնում: Այս տարուայ Յուլիսին մեկնարկեց Հայաստանի մասնակցութիւնը Մալիում գործող ՄԻՆՈՒՍՄԱ խաղաղապահ առաքելութեանը: Իսկ բոլորովին վերջերս ՄԱԿի խաղաղապահ գործողութիւններին մեր ապագայ մասնակցութեան եւ համապատասխան կարողութիւնների զարգացման ու տրամադրման առումով մենք ստանձնել ենք նոր յանձնառութիւններ, որոնք են երկրորդ աստիճանի դաշտային հոսպիտալի եւ կցագրուած անձնակազմի նախապատրաստումը եւ ինքնաշէն պայթուցիկ սարքերի վնասազերծման յատուկ վաշտի պատրաստականութեան ապահովումը: Հայաստանի խաղաղապահ կարողութիւնների ստեղծման եւ զարգացման պարագայում առանցքային է եղել Միացեալ Նահանգների, Յունաստանի, Գերմանիայի, ինչպէս նաեւ ՆԱՏՕի կառոյցների եւ միւս անդամ պետութիւնների դերակատարութիւնը, ինչի համար յատուկ շնորհակալութիւն եմ յայտնում: Միջազգային խաղաղութեան ու անվտանգութեան պահպանումը բոլորի՝ թէ՛ մեծ թէ՛ փոքր պետութիւնների առաջնային պատասխանատուութիւնն է, իսկ խաղաղապահութիւնը՝ այդ նպատակին հասնելու գլխաւոր միջոցներից մէկը: Այսօր մեզ դեռեւս հարկաւոր են լրացուցիչ հաւաքական ջանքեր՝ այն առաւել ամրապնդելու համար: Ակնյայտ է, որ միայն համապարփակ,  համադրուած ու կշռադատուած մօտեցմամբ է հնարաւոր ունենալ խաղաղ եւ ապահով աշխարհ>>, եզրափակած է նախագահը: