ՄՈՍԿՈՒԱ, <<Ռոյթըրզ>> - Ռուսիոյ պաշտպանութեան նախարարութիւնը Սեպտեմբեր 30ին հաստատեց, որ Սուրիոյ մէջ գործող ահաբեկչական խմբաւորումներուն դէմ իր գործողութիւնները ընթացք առած են՝ նշելով, որ ռուսական օդուժը հարուածած է զինուորական սարքեր, հաղորդակցութեան միջոցներ եւ զինապահեստանոցներ:

Նախարարութիւնը նաեւ նշած է, որ Սուրիոյ մէջ օդային հարուածներուն վերաբերեալ տեղեկութիւններ կը փոխանակէ Միացեալ Նահանգներու հետ:
Իր կարգին, ամերիկացի պաշտօնատար մը <<Սի.Էն.Էն.>>ին յայտնեց, որ ռուսական օդուժը Սուրիոյ մէջ իր առաջին օդային յարձակումը գործած է՝ հարուածելով Հոմսի եւ Համայի գիւղական շրջաններուն մէջ գտնուող թիրախներ:

Ռուսիոյ նախագահի բանբեր Տմիթրի Փեսքով ըսաւ, որ Սուրիոյ մէջ ռուսական օդուժի առաքելութիւնը ահաբեկչութեան դէմ պայքարն ու <<այդ երկիրի օրինական իշխանութիւններուն՝ այդ ծիրին մէջ թափած ջանքերուն աջակցիլն է>>:

Նախքան այդ, Ռուսիոյ նախագահ Վլատիմիր Փութին յայտնած էր, որ Սուրիոյ նախագահ Պաշշար Ասատին ցուցաբերուելիք աջակցութիւնը օդուժի ճամբով պիտի ըլլայ. Սուրիոյ մէջ ցամաքային գործողութիւններ պիտի չշղթայազերծուին:

Միացեալ Նահանգներու արտաքին գործոց նախարար Ճան Քերի իր կարգին յայտնեց, որ իր կարծիքով՝ Փութին կացութիւնը աւելի կը բարդացնէ, <<որովհետեւ, եթէ ան շարունակէ Սուրիոյ նախագահ Պաշշար Ասատի, Իրանի եւ <<Հըզպալլա>>ի ի նպաստ կողմնակալութիւն ընել, ապա շրջանին մէջ սիւննի երկիրներուն հետ լուրջ հարց պիտի դիմագրաւէ, եւ ատիկա կրնայ նշանակել, որ կրնայ ինք նոյնիսկ այդ սիւննի ծայրայեղականներուն թիրախ դառնալ>>։

Քերի նշեց, որ իրենք կ՛աջակցին ռուսական օդային հարուածներուն, պայմանաւ որ Ասատի վարչակազմին աջակցութեան համար չըլլան անոնք:
Նաեւ, Սուրիոյ նախագահական պալատը հաստատեց, որ Ասատ ռուսական զինեալ ուժերը Սուրիոյ մէջ օգտագործելու խնդրանքով դիմած էր Փութինին։
Իսկ իսյայէլեան <<Հաարեց>> թերթը հաղորդեց, որ Ռուսիա իր օդային հարուածներէն ժամեր առաջ անոնց մասին տեղեակ պահած էր Իսրայէլը։
Վերջապէս, Սուրիական ազատ բանակը յայտարարեց, որ ռուսական օդուժը իր դիրքերը հարուածած է: