ԵՐԵՒԱՆ, <<Էրմենիհապեր>> -  Թուրքիոյ խորհրդարանի հայ պատգամաւոր Կարօ Փայլան, խորհրդարանական նիստին ընթացքին իր ունեցած ելոյթին սկիզբը պատգաւորները հայերենով ողջունած է՝ <<Բարեւ ձեզ>> ըսելով. այս մասին գրած է թրքական <<Միլլիյէ>>չ թերթը:

Ընդդիմադիր Ժողովուրդներու ժողովրդավարական կուսակցութեան անդամ Փայլան անդրադարձած է Տիգրանակերտի իրաւաբանական կաճառի ղեկավար Թահիր Էլչիի սպանութեան՝ զայն նմանցնելով Հրանդ Տինքին եւ յայտարարելով, որ ան եւս <<խաղաղութեան աղաւնի>> մըն էր:

Փայլան իր ելոյթին մէջ իշխանութեանց հասցէին սուր քննադատութիւններ հնչեցուցած է՝ ըսելով. <<Այս պետութեան վրայ 3 մատ հաստութեամբ փոշի նստած է: Մեր պարտականութիւնն է ոչ թէ ծածկել այդ փոշին, այլ՝ մաքրել: Եթէ չմաքրենք, ապա կը կրկնուին յանցագործութիւնները: Հրանդ Տինքի սպանութիւնը ծածկեցիք, այդ պատճառով ալ յանացագործութիւնը կրկնուեցաւ: Թահիր Էլչի Հրանդ Տինքի նման կը հաւատար խաղաղութեան, եղբայրութեան, ժողովրդավարութեան, եւ կը պայքարէր անոնց համար: Երկուքն ալ սպաննուեցան: Այս պետութեան վրայ ծանրացած փոշիին ապացոյցն է անիկա: Եթէ պետութիւնը յանցագործութիւն կատարէ, ո՞վ պիտի բացայայտէ եւ ո՞վ պիտի վերահսկէ>>։

Նշենք, որ Տիգրանակերտ նահանգի Սուր գաւառին մէջ լրագրողներուն յայտարարութիւն մը կատարելու ընթացքին, Էլչի Նոյեմբեր 21ին ահաբեկիչներու կողմէ սպաննուեցաւ: Սպանութենէն վայրկեաններ առաջ, Էլչի լրագրողներուն կ՛ըսէր. <<Այս պատմական տարածքը շատ քաղաքակրթութիւններու օրրանը եղած է, այս տարածքին մէջ այլեւս բախումներ եւ պատերազմներ չենք ուզեր>>։ Սպանութենէն քանի մը օր առաջ, Թահիր Էլչի ձերբակալուած էր ոստիկանութեան կողմէ, որմէ ետք ազատ արձակուած էր՝ երկրէն չբացակայելու պայմանով:

Նշենք, որ Էլչի նաեւ յայտարարած էր, թէ Քիւրտիստանի բանուորական կուսակցութիւնը ահաբեկչական կազմակերպութիւն մը չէ, այլ՝ քաղաքական շարժում մը, որ քաղաքական պահանջներ ունի եւ հասարակութեան լուրջ աջակցութիւնը կը վայելէ:

Տասնեակ հազարաւորներ հաւաքուած են Էլչիի յուղարկաւորութեան առիթով՝ պարզելով վերտառութիւններ, որոնց վրայ գրուած էր Թահիր Էլչիի նախադասութիւններէն մէկը. <<Գլուխ չծռեցի, ես ձեզմէ՞ պիտի վախնամ>>։ Չէր վախցած, եւ ահաւասիկ սուղ կը վճարէ իր այդ քաջութեան համար։