ՓԱՐԻԶ, <<Ա.Էֆ.Փէ.>> -  Միացեալ Նահանգներու նախագահ Պարաք Օպամա եւ Թուրքիոյ նախագահ Ռեչեփ Թայիփ Էրտողան Փարիզի մէջ կայացող կլիմայական հարցերով ՄԱԿի վեհաժողովի ծիրին մէջ ունեցան հանդիպում մը, որուն ընթացքին քննարկեցին Սուրիոյ զարգացումներն ու ռուս-թրքական յարաբերութիւնները:

Հանդիպումէն ետք տրուած մամլոյ ասուլիսի մը ընթացքին, Էրտողան անդրադարձաւ ռուս-թրքական յարաբերութիւններուն՝ նշելով. <<Շրջանային լարուածութիւնը մե՛զ ալ կը տխրեցնէ: Մեր մտահոգութիւնը այն է, որ այս իրավիճակէն վնասով դուրս չգանք, այլ ընդհակառակը՝ նպաստենք շրջանին մէջ խաղաղութեան հաստատման>>:

Իր կարգին, Օպամա ըսաւ. <<(Ռուսիոյ նախագահ) Փութինի հետ զրոյցիս ընթացքին ընդգծեցի, որ լարուածութիւնը աւելցնելը որեւէ օգուտ պիտի չբերէ: Այս հարցին մէջ միասին աշխատինք: Թուրքիա ինքզինք պաշտպանելու իրաւունքը ունի: Բոլորս հասարակաց թշնամի մը ունինք եւ պէտք է զայն պարտութեան մատնենք, որպէսզի Սուրիոյ մէջ քաղաքական փոխանցում իրականացուի>>:

Օպամա նաեւ Էրտողանին կոչ ուղղեց <<<<Իսլամական պետութիւն>> ահաբեկչական խմբաւորման սպառնալիքին վերջ տալու ջանքերը աշխուժացնելու:
Միւս կողմէ, Գերմանիոյ նախարարաց խորհուրդը Դեկտեմբեր 1ին վաւերացուց գերմանական բանակին կողմէ Սուրիոյ եւ Իրաքի մէջ <<Իսլամական պետութեան>> դէմ զինուորական գործողութիւններուն մասնակցելու որոշումը: Այդ գործողութիւններուն համար նախատեսուած են 1200 գերմանացի զինուորներ, իսկ անոնց առաքելութիւնը սահմանափակուած է մէկ տարիով, որ սակայն կրնայ երկարաձգուիլ:

Որոշումը պէտք է վաւերացուի Գերմանիոյ խորհրդարանին կողմէ։