ԵՐԵՒԱՆ, <<Ազատութիւն>> - Հայաստանի նախագահ Սերժ Սարգսեան 20 Մայիսին ընդունած է Եւրասիական միջկառավարական խորհուրդի անդամներն ու Եւրասիական տնտեսական յանձնաժողովի անձնակազմի նախագահ Տիգրան Սարգսեանը, որոնք Հայաստան կը գտնուին Եւրասիական միջկառավարական խորհուրդի հերթական նիստին մասնակցելու նպատակով:

Ընդգծելով, որ առաջին անգամն ըլլալով է, որ Հայաստանի մէջ կը գումարուի միջկառավարական խորհուրդի նիստ, Սերժ Սարգսեան վստահութիւն յայտնած է այն մասին, որ անիկա արդիւնաւէտ պիտի ըլլայ: <<Մենք բոլորս անդամակցել ենք Եւրասիական տնտեսական միութեանը՝ ելնելով մեր տնտեսական շահերից, մեր քաղաքացիների շահերից: Շատ կարեւոր է, որ ընդունուող որոշումները լինեն շօշափելի գործարար միջավայրի, իւրաքանչիւր ապրանքի գնորդի եւ ծառայութեան պատուիրատուի համար: Այդ նպատակին հասնելու համար, կարծում եմ, որ ամենակարեւոր հարցը խոչընդոտների վերացումն է՝ տեխնիկական խոչընդոտների, որոնք խանգարում են ապրանքների եւ ծառայութիւնների ազատ տեղաշարժին, դրանով իսկ՝ նուազեցնում ինտեգրացիոն գործընթացներից տնտեսական արդիւնաւէտութիւնը>>, ըսած է նախագահը:

Եւրասիական միջկառավարական խորհուրդի նախագահող երկրի՝ Ղազախիստանի վարչապետ Քարիմ Մասիմովը յայտնած է, որ նախատեսուած է Եւրասիական տնտեսական միութեան հետագայ զարգացման առնչուած հարցերու քննարկում: <<Նախագահներու հանդիպման նախօրէին մենք պիտի աշխատինք քննարկել եւ օրակարգէ հանել հարցերուն մեծամասնութիւնը, որպէսզի բարձր մակարդակով քննարկման ներկայացնենք միայն հետագայ զարգացման տեսանկիւնէ ռազմավարական մեծ հարցերը>>, ըսած է Մասիմով:

Ան տեղեկացուցած է, որ վարչապետներու մակարդակով կայացող նիստին ինչպէս նեղ, այնպէս ալ ընդլայնուած կազմով հանդիպումներու ընթացքին քննարկման համար նախատեսուած են բազմաթիւ հարցեր:

Տիգրան Սարգսեան ներկայացուցած է ԵՏՄի համարկման այլ միաւորումներու հետ համագործակցութեան կարելիութիւնները, ինչպէս նաեւ առանձին երկիրներու հետ յարաբերութիւններու զարգացման հեռանկարները:

ԵՏՄի անդամ երկիրներու տն-տեսութիւններու հետագայ բնականոն զարգացման առումով Հայաստանի նախագահը կարեւոր նկատած է անվտանգութեան բաղադրիչը եւ այդ տեսանկիւնէ ներկայացուցած Լեռնային Ղարաբաղի տագնապին վերջին զարգացումները: