ԵՐԵՒԱՆ, <<Արմէնփրէս>> - Հայաստանի նախագահ Սերժ Սարգսեան 23 Մայիսին ընդունած է ԵԱՀԿ խորհրդարանական վեհաժողովի Հարաւային Կովկասի հարցերու յատուկ ներկայացուցիչ Քրիսթիան Վիկենինը:  Ողջունելով հիւրը՝ նախագահը ընդգծած է, որ Հայաստան բարձր կը գնահատէ ԵԱՀԿի դերակատարութիւնը որպէս համաեւրոպական անվտանգութեան ոլորտի կարեւոր կազմակերպութիւն եւ մասնակից երկիրներուն միջեւ իրաւահաւասար երկխօսութեան կարեւորագոյն հարթակ: Ըստ անոր՝ ԵԱՀԿ խորհրդարանական ձեւաչափը համագործակցութեան եւ երկխօսութեան լայն կարելիութիւն կը ստեղծէ խորհրդարանականներուն միջեւ կապերու, համագործակցութեան կարելիութիւնները օգտագործելու՝ ի նպաստ անվտանգութեան եւ ժողովուրդներու երկխօսութեան խրախուսման: Սերժ Սարգսեան վստահութիւն յայտնած է այն մասին, որ Քրիսթիան Վիկենինի ունեցած հարուստ փորձառութիւնը՝ որպէս պատգամաւորի, նաեւ որպէս Պուլկարիոյ կառավարութեան նախկին անդամի, կարելիութիւն պիտի տայ իրեն վստահուած հարցերուն մօտենալու շատ աւելի համապարփակ կերպով:

Քրիսթիան Վիկենին նախ շնորհաւորած է Հայաստանի նախագահը՝ Վիեննայի մէջ Լեռնային Ղարաբաղի տագնապի խաղաղ լուծման ուղղութեամբ կատարուած կարեւոր քայլին գծով՝ նշելով, որ մնայուն խաղաղութեան հասնելու համար տակաւին անհրաժեշտ է շատ ջանքեր գործադրել: Այս իրավիճակին մէջ, ըստ ԵԱՀԿ խորհրդարանական վեհաժողովի յատուկ ներկայացուցիչին, վերաժողովը իր դերակատարութիւնը կը տեսնէ խաղաղութեան հաստատման ուղղութեամբ գործադրուող ջանքերուն օժանդակելու մէջ: <<Կը վերահաստատեմ,  որ ԵԱՀԿ խորհրդարանական վեհաժողովին համար Լեռնային Ղարաբաղի տագնապը խաղաղ ուղիով լուծելէ բացի, այլ տարբերակ գոյութիւն չունի, եւ մենք ամբողջութեամբ կը սատարենք ԵԱՀԿ Մինսկի խումբի համանախագահներուն գործունէութեան>>, եզրափակած է ան։