ՊՈԼԻՍ, <<Մարմարա>> - Թրքական <<Հիւրրիյէթ>> թերթի Յուլիս 25ի թիւին մէջ յօդուածագիր Ֆաթիհ Չեքիրկէ <<Հայաստանի Հետ Դարձեալ Բանակցութիւն>> խորագրեալ յօդուածին մէջ կը գրէ, թէ արտաքին գործոց նախարար Մեւլուտ Չաւուշօղլու սկսած էր գետին պատրաստելու՝ Հայաստանի հետ բանակցութիւններու համար, սակայն զինուորական հարուածը կասեցուցած է այդ աշխատանքը։

Յօդուածին մէջ կը կարդանք, որ Չաւուշօղլու Յուլիս 15ին, Պաքուէն Սամսուն վերադարձած էր <<շատ լաւ տրամադրութեամբ>>։ Նախարարը Պաքուի մէջ խորհրդակցութիւններ ունեցած էր Ատրպէյճանի նախագահ Իլհամ Ալիեւի հետ, Հայաստանի հետ յարաբերութիւններ մշակելու, սահմանային հարցերը լուծելու եւ Լեռնային Ղարաբաղի հարցը լուծելու կապակցութեամբ։ Նախարարը նաեւ Չեքիրկէին ըսած էր. <<Դեռ աւելի՛ լաւ բաներ պիտի պատահին, հաշտութեան ու խաղաղութեան մասին լաւ լուրեր պիտի լսէք. Ռուսիայէն ետք՝ այլ երկիրներ ալ պիտի շահինք իբրեւ բարեկամ>>։

Այս գոհունակութեամբ վերադարձող Չաւուշօղլու յանկարծ Թուրքիոյ մէջ դէմ յանդիման եկած էր Յուլիս 15ի զինուորական հարուածին։

Չեքիրկէ կ՛եզրակացնէ, որ արտաքին գործոց նախարարի մը համար դժբախտութիւն է <<երկրին ի նպաստ այսպիսի գոհացուցիչ շփումներ ունենալէ ետք՝ երկիր վերադառնալ ու յանկարծ դէմ յանդիման մնալ հայրենադաւերու հետ>>։

Յուլիս 25ին Չաւուշօղլու տուաւ մամլոյ ասուլիս մը, որ իր առաջինն էր՝ զինուորական հարուածի փորձէն ետք։ Ասուլիսին ընթացքին նախարարը նշեց, որ Պաքուի մէջ իր խորհրդակցութեանց գլխաւոր նիւթերէն մէկը եղած է Հայաստանի եւ Ատրպէյճանի միջեւ խաղաղութեան հաստատումը, միաժամանակ նշելով, որ ցարդ այդ կապակցութեամբ շփումներ չեն կատարուած Երեւանի հետ։