Հիւսիսային Ֆրանսայի Ռուեն քաղաքի արուարձաններէն մէկուն մէջ երկու զինեալ մարդիկ պատարագի ժամանակ մուտք գործելով Սանթ Էթիեն տիւ Ռուվրէ եկեղեցին պատանդ բռնեցին 84 տարեկան Ժաք վրդ. Համելը եւ չորս ուրիշներ: Անոնք հետագային սպաննեցին վարդապետը` մորթելով զայն:

Հետագային ոստիկանութիւնը պաշարեց եկեղեցին, ապա արագ միջամտութիւն մը կատարելով սպաննեց երկու զինեալները:

ՏԱՀԵՇ-ի առնչակից <<Աամաք>> կայքը հաղորդեց, որ յարձակումը գործած են <<Իսլամական պետութեան երկու զինուորներ>>:

Ֆրանսայի նախագահ Ֆրանսուա Հոլլանտ դէպքէն անմիջապէս ետք այցելեց եկեղեցին` յայտնելով, որ յարձակում գործողները <<վախկոտ սպանութիւն>> կատարած են, իսկ Ֆրանսան <<բոլոր միջոցներով>> պիտի պայքարի ՏԱՀԵՇ-ի դէմ:

Ֆրանչիսկոս պապը դատապարտեց <<այս անհեթեթ բռնարարքին ցաւն ու ահաւորութիւնը>>:

Ֆրանսայի ներքին գործոց նախարարութեան բանբեր Փիեռ-Հանրի Պրանտէ յայտնեց, որ ոստիկանութեան գործողութեան ընթացքին ծանրօրէն վիրաւորուած է պատանդներէն մէկը: Զինեալները <<վնասազերծուած>> են, երբ եկեղեցիէն դուրս եկած են:

Վարչապետ Մանուէլ Վալս յայտնեց, որ զարհուրած է այս <<բարբարոս յարձակումէն>>: <<Ամբողջ Ֆրանսան եւ բոլոր կաթողիկէները վիրաւորուած են: Մենք կողք-կողքի պիտի կանգնինք>>, գրեց ան <<Թուիթըր>>-ի վրայ:

Ֆրանսական դատախազութիւնը յայտարարեց, որ յարձակումին հարցով կասկածեալ մը ձերբակալուած է:

Միւս կողմէ, նշենք, որ զինեալ մը Պերլինի մէջ կրակ բացաւ դարմանատան մը վրայ, ապա անձնասպան եղաւ: Գերմանական ոստիկանութիւնը հետագային հաղորդեց, որ դէպքին ընթացքին վիրաւորուած բժիշկ մը մահացած է: