ՖԻԼԱՏԵԼՖԻԱ, <<Փոլիթիքօ>> - Միացեալ Նահանգներու Դեմոկրատ կուսակցութեան համագումարի երկրորդ օրը՝ Երեքշաբթի, Յուլիս 26ին, պատուիրակները պաշտօնապէս իրենց կուսակցութեան նախագահական թեկնածու ընտրեցին Հիլըրի Քլինթընը, որ Յուլիս 28ին պաշտօնապէս պիտի ընդունի թեկնածութեան առաջարկը, որ զինք պիտի դարձնէ պատմութեան մէջ Միացեալ Նահանգներու նախագահութեան առաջին կին թեկնածուն՝ գլխաւոր կուսակցութենէ մը։

Քուէարկութեան ընթացքին, Քլինթընի գլխաւոր մրցակից Պըրնի Սենտըրզի համակիր պատուիրակներէն ոմանք դուրս եկան սրահէն՝ բողոքելով ընտրութեան գործընթացին դէմ, զոր բարեփոխելու աշխատանքը արդէն իսկ ընթացքի մէջ է՝ շնորհիւ Սենտըրզի ճնշումներուն։

Երեքշաբթի օրուան գլխաւոր բանախօսն էր նախկին նախագահ Պիլ Քլինթըն, որ դրուատեց իր կնոջ արժանիքները եւ շեշտեց, թէ Միացեալ Նահանգներու յաջորդ նախագահի ընտրանքը <<իրականին եւ շինծուին>> միջեւ է՝ վստահեցնելով, որ <<իրական>>ը Հիլըրի Քլինթընն է։

Միւս կողմէ, Հանրապետական կուսակցութեան նախագահութեան թեկնածու Տանըլտ Թրամփ Յուլիս 27ին դիմեց Ռուսիոյ նախագահ Վլատիմիր Փութինին, որ բացայայտնէ Հիլըրի Քլինթընի մօտաւորապէս 30,000 համացանցային նամակները, որոնք ան իր նամակներու սեփական ցանցին վրայ պահած էր, երբ արտաքին գործոց նախարար էր։

Թրամփ այս յայտարարութիւնը կ՛ընէր, մինչ Դեմոկրատ կուսակցութեան համակարգիչներէն ներս թափանցած կայքահէններուն բացայայտած՝ կուսակցութեան ղեկավարներուն միջեւ նամակագրութիւններու գայթակղութիւնը կասկածներ յառաջացուցած էր, որ այդ տեղեկութիւնները բացայայտուած էին Ռուսիայէն գործող անհատներու կողմէ, որոնք նոյնիսկ Քրեմլինի հաւանութիւնը կը վայելեն։