ՊԷՅՐՈՒԹ, <<Ազդակ>> - Լիբանանի դէմ Յուլիսեան պատերազմի տասնամեակին առիթով կազմակերպուած ձեռնարկի մը ընթացքին, <<Հըզպալլա>>ի ընդհանուր քարտուղար սէյիտ Հասան Նասրալլա արտասանեց պատկերասփռուած ճառ մը, որուն մէջ հաստատեց, թէ լիբանանեան քաղաքական բոլոր կողմերը համաձայն են, որ նախագահական ընտրութիւնը բանալին է հարցերու լուծման, եւ որ բոլորին դիմաց տուեալները յստակ են:

Ան շեշտեց, թէ կուսակցութիւնը նեցուկ կը կանգնի Փոփոխութիւն եւ բարեկարգում համախմբումի նախագահ, երեսփոխան զօր. Միշել Աունի թեկնածութեան, իսկ խորհրդարանի նախագահի պաշտօնին համար՝ Նեպիհ Պըրրիի թեկնածութեան:

Ան նաեւ հաստատեց ազգային երկխօսութիւնը շարունակելու անհրաժեշտութիւնը՝ ընդգծելով, որ կառավարութիւնը պատասխանատու է քարիւղի եւ կազի թղթածրարներուն, նկատի ունենալով Լիբանանի մէջ տիրող ելեւմտական եւ տնտեսական պայքարը:

<<Լիբանանը եւ ամբողջ աշխարհը այսօր տեղեակ են, որ (լիբանանեան) Դիմադրութիւնը Իսրայէլին դէմ դնելու եւ անոր ուժը հաւասարակշռելու կարողութիւնն ունի, հետեւաբար՝ Լիբանանի բնական կազն ու քարիւղը պաշտպանուած պէտք է նկատել եւ սկսիլ այդ հարստութիւնը արտահանելու աշխատանքին>>, ըսաւ ան։

Նասրալլա ընդգծեց, որ <<Իսլամական պետութիւն>>ն ու անոր նման հաւատադրժողական խմբաւորումները ստեղծուած են Միացեալ Նահանգներու եւ Իսրայէլի կողմէ, աւելցնելով, որ ներկայիս գրաւը դրուած է Ռաքքայի եւ Մուսուլի ճակատամարտերուն վրայ:

<<Հինգ տարիներ առաջ, երբ խօսքս ուղղեցի <<Քայիտա>>ի եւ <<Իսլամական պետութեան>> զինեալներուն, հաստատեցի, որ Միացեալ Նահանգներ կը փափաքի զիրենք քանդել՝ զանոնք ստեղծելէ, մարզելէ եւ զինելէ ետք: Իսկ այսօր ես այդ խմբաւորումներուն կ՛ըսեմ. <<5 տարիներ շարունակ ձեզ օգտագործեցին՝ քանդելու համար Դիմադրութեան առանցքը, շրջանի ժողովուրդները եւ անոնց յոյսերը, որպէսզի հիմնուին Միացեալ Նահանգներու եւ Իսրայէլի ենթակայ վարչակարգեր: Եթէ դուք նուազագոյն իսլամականութիւնը ունիք ձեր մէջ, վե՛րջ տուէք Միացեալ Նահանգներու եւ Իսրայէլի շահերուն ծառայող այս պատերազմին>>, ըսաւ Նասրալլա:

<<Մեր դիմաց ո՛չ մէկ այլընտրանք կայ՝ բացի Հալէպի պայքարը շարունակելէ եւ ըլլալէ հո՛ն, ուր պարտականութիւն պէտք է ստանձնել>>, եզրափակեց Նասրալլա: