ՀԱԼԷՊ - <<Պի.Պի.Սի.>> հաղորդեց, որ Սուրիոյ բանակը վերատիրացած է Հալէպ քաղաքի այն բաժիններուն, որոնք անցեալ ամիս գրաւուած էին զինեալ ընդդիմութեան կողմէ: Սուրիոյ Պետական պատկերասփիւռի կայանը հաղորդեց, որ սուրիական բանակը յարձակում գործելով՝ վերատիրացած է քաղաքի հարաւը գտնուող այն երկու զինուորական վարժարաններուն, որոնք անցեալ ամիս գրաւուած էին զինեալ ընդդիմութեան կողմէ:

Մարդկային իրաւանց սուրիական կեդրոնը հաստատեց, որ Սուրիոյ բանակը վերատիրացած է նշեալ դիրքերուն՝ զինեալ ընդդիմութեան առջեւ քաղաքի հարաւային անցքերը փակելով։

<<Ճազիրա>> արբանեակային պատկերասփիւռի կայանը իր կարգին նշեց, որ Սուրիոյ բանակը նաեւ իր վերահսկողութեան տակ առած է Ռամուսայի ճամբան, որ կ՛առաջնորդէ դէպի արեւելեան Հալէպի թաղամասերը տանող ճեղքը, այդպիսով՝ վերականգնելով ընդդիմութեան վերահսկողութեան տակ գտնուող արեւելեան Հալէպի պաշարման օղակը:

Միւս կողմէ, վերջին քանի մը օրերուն, Սուրիոյ հիւսիսը սկսած է Թուրքիոյ զինուած ուժերուն կողմէ իրագործուող <<Եփրատի վահան>> անունով մկրտուած ներխուժումին երկրորդ փուլը, որուն ընթացքին թրքական բանակի հրասայլային նոր ստորաբաժանումներ մուտք գործած են Սուրիա: Թրքական ուժերուն աջակցութեամբ, <<Սուրիական ազատ բանակ>>ի ստորաբաժանումները յաջողած են վերահսկողութեան տակ առնել Թուրքիոյ սահմանակից Ազազ քաղաքէն մինչեւ Ճարապլոս՝ 90 քիլոմեթր տարածքը:

Նշենք նաեւ, որ Սեպտեմբեր 5ին, իրերայաջորդ ականահարումներ տեղի ունեցան Հոմսի, Դամասկոսի գիւղական շրջանի, Թարթուսի եւ Հասաքէի մէջ: Արձանագրուեցան 48 զոհեր եւ բազմաթիւ վիրաւորներ: