ԵՐԵՒԱՆ, <<Ազատութիւն>> - Հայաստանի ֆութպոլի դաշնակցութիւնը 19 Հոկտեմբերին հրապարակած է հաղորդագրութիւն մը, որուն մէջ նշած է, թէ <<առասպելական ֆութպոլիստ>> Արթուր Պետրոսեան պիտի գլխաւորէ Հայաստանի ազգային հաւաքականը։

Դաշնակցութիւնը իր հրապարակած հաղորդագրութեան մէջ նշած է, որ ազգային հաւաքականի գլխաւոր մարզիչի նշանակման առնչուած բանակցութիւնները աւարտած են, եւ 1 Նոյեմբերէն հաւաքականի նախկին ֆութպոլիստ, ներկայիս զուիցերիական <<Ցիւրիխ-2>> խումբի գլխաւոր մարզիչ Արթուր Պետրոսեանի հետ պիտի կնքուի համապատասխան պայմանագիր:

Հայաստանի ազգային նորանշանակ հաւաքականի գլխաւոր մարզիչ Արթուր Պետրոսեան 45 տարեկան է, ծնունդով Գիւմրի քաղաքէն։

Հայկական ֆութպոլի լաւագոյն կիսապաշտպաններէն մէկը հանդիսացող Պետրոսեան իր մարզական ասպարէզը սկսած է Գիւմրիի <<Շիրակ>> հեղինակաւոր ակումբին մէջ, ուր հանդէս եկած է 1989-1998 թուականներուն: 1998-1999ին Արթուր Պետրոսեան խաղացած է իսրայէլեան <<Մաքքապի>>ի մէջ, 1999-2000 թուականներուն վերադարձած է <<Շիրակ>>, 1999ին հանդէս եկած է նաեւ Նիժնի Նովգորոտի <<Լոկոմոտիւ>>ի կազմին մէջ:

2000-2003 թուականներուն Պետրոսեան խաղացած է զուիցերիական <<Եանկ Պոյզ>>ի հետ, 2003-2006 թուականներուն՝ <<Ցիւրիխ>>ի մէջ:

Ան Հայաստանի ազգային հաւաքական հրաւիրուած է 1992 թուականին, 1992-2005 թուականներուն հաւաքականի կազմին հետ խաղացած է 70 մրցումի, դարձած 11 կօլի հեղինակ, Հայաստանի ազգային հաւաքականի բոլոր ժամանակներուն երկրորդ լաւագոյն ռմբարկուն է:

Արթուր Պետրոսեան Հայաստանի քառակի ախոյեան է (1992, 1994, 1995, 1999թթ?), Հայաստանի կրկնակի բաժակակիր (1996, 1999), Զուիցերիոյ բաժակակիր (2005), Զուիցերիոյ ախոյեան (2005-2006): 1996, 2000 թուականներուն նկատուած է Հայաստանի լաւագոյն ֆութպոլիստը, 1997ին՝ Հայաստանի լաւագոյն ռմբարկու:

Պետրոսեան մարզչական գործունէութիւնը սկսած է 2006 թուականին՝ գլխաւորելով <<Ցիւրիխ>>ի Մ-14, 15, 16, 18 խումբերը, 2011ին <<Ցիւրիխ>>ի Մ-18 խումբին հետ դարձած է Զուիցերիոյ ախոյեան:

2014-2015 թուականներուն եղած է Հայաստանի ազգային հաւաքականի գլխաւոր մարզիչ՝ Պեռնար Շալանտի օգնականը:

2016 թուականին ստացած է մարզչական արտօնագիր: