ԵՐԵՒԱՆ, <<Երկիր Մեդիա>>.- <<Wikileaks>>ը հրապարակած է Միացեալ Նահանգներու նախագահի թեկնածու Հիլըրի Քլինթընի աշխատակազմի ղեկավար Ճան Փըտեսթայի նամակագրութենէն բաժին մը, որուն մէկ մասին մէջ անդրադարձ կայ Հայոց Ցեղասպանութեան շուրջ քննարկումներուն:

Նամակը գրուած է 2015ի Ապրիլ 19ին եւ ուղղուած է Քլինթընի արտաքին քաղաքականութեան հարցերով խորհրդական Ճէյք Սալըվընին:

Նամակին մէջ գրուած է. <<Ուրբաթ օրը Հայոց Ցեղասպանութեան 100ամեակի ոգեկոչման օրն է: Կ՛ենթադրեմ, որ հայկական կազմակերպութիւններ ակնկալեն յայտարարութիւն մը կամ որեւէ նշան մը, թէ ան (Քլինթըն, Խմբ.) պիտի արտասանէ <<ցեղասպանութիւն>> բառը, եթէ նախագահ ընտրուի: Իբրեւ ծերակուտական եւ թեկնածու, ան յստակ դիրքորոշում ունեցած է Ցեղասպանութեան ճանաչման գծով: Իբրեւ արտաքին գործոց նախարար, ան չէ օգտագործած եզրը (ցեղասպանութիւն, Խմբ.), սակայն կեդրոնացած է Թուրքիոյ եւ Հայաստանի հաշտեցման վրայ:

Սպիտակ տունը մինչ այսօր խուսափած է <<ցեղասպանութիւն>> բառը օգտագործելէն: Ներկայիս, ներքին քննարկում տեղի կ՛ունենայ այդ դիրքորոշումը փոխելու շուրջ՝ 100ամեակին առթիւ: Սակայն, ամենայն հաւանականութեամբ, դիրքը պիտի չփոխուի:

Երկու հարցում.

– Համաձա՞յն էք, որ ան պէտք է որդեգրէ այդ նոյն դիրքորոշումը, զոր արդէն ունէր՝ իբրեւ ծերակուտական եւ թեկնածու, եւ զոր սակայն չէր հաստատած, երբ ան արտաքին գործոց նախարար էր:

– Համաձա՞յն էք բոլորդ, որ մենք պէտք է պարզապէս սպասենք, քանի դեռ մեզի հարցում չէ ուղղուած, եւ ուստի որեւէ նախաձեռնող քայլի չդիմենք:

Ներեցէք ձեզ այս հարցով անհանգստացնելուս համար, սակայն, ինչպէս գիտէք, այս հարցը կարեւոր է ամերիկահայերուն համար>>: