ՀԱԼԷՊ - <<Գանձասար>>ը կը գրէ, թէ ըստ Սուրիոյ պետական լրատու աղբիւրներու՝ Թուրքիոյ բանակի ռազմական օդանաւերը Հոկտեմբեր 21ին ռմբակոծած են Հալէպի հիւսիսային աւանները՝ պատճառ դառնալով 150 զոհերու:

Սուրիոյ բանակի ընդհանուր հրամանատարութիւնը, զգուշացնելով թրքական կողմը՝ յայտարարած է, թէ թշնամական նման գործողութիւններ ահռելի հետեւանքներ կ՛ունենան՝ սպառնալով տարածաշրջանի ապահովութեան ու կայունութեան, միաժամանակ նպաստելով ահաբեկչութեան տարածման:

<<Սուրիական օդուժի իրաւունքն է նման ներխուժման կրկնութեան պարագային՝ վա՛ր առնել թրքական որեւէ օդանաւ>>, ըսուած է հրամանատարութեան յայտարարութեան մէջ:

Թրքական կողմը կը պնդէ, թէ իր օդային հարուածներուն թիրախը քիւրտ զինեալներ են, որոնք կը պայքարին <<Իսլամական պետութիւն>> ահաբեկչական կազմակերպութեան դէմ: Թրքական տուեալներով՝ սպաննուած են 160-200 քիւրտ զինեալներ։

Սուրիական կողմը դատապարտած է այս ներխուժումը՝ շեշտելով, որ անիկա պատճառ դարձած է Սուրիոյ քաղաքացիներու սպանութեան:

Յիշեցնենք, որ այս գործողութիւններուն առնչութեամբ մտահոգութիւն յայտնած էր Ռուսիոյ արտաքին գործոց նախարար Սերկէյ Լաւրով։

Թուրքիոյ վարչապետ Պինալի Եըլտըրըմ, փոխադարձելով Լաւրովի յայտարարութեան՝ ըսաւ, որ Թուրքիոյ գործողութիւններուն մէջ մտահոգիչ ոչինչ կայ։

<<Կարեւոր չէ, թէ ո՛վ՝ ի՛նչ կ՛ըսէ ահաբեկչական կազմակերպութիւններուն դէմ մեր պայքարին ընթացքին։ Թրքական կողմը պիտի շարունակէ ընել այն, ինչ ըրած է՝ իր սահմաններուն եւ երկրի ապահովութիւնը երաշխաւորելու համար>>, յայտնեց վարչապետը։

Միւս կողմէ, Հալէպի մէջ մարդասիրական եռօրեայ հրադադարէն ետք, Հոկտեմբեր 23ին վերսկսած են մարտերը, իսկ ռուսական օդուժը սկսած է ռմբակոծելու ահաբեկիչներու թիրախները։ Ռուսիոյ արտաքին գործոց նախարարութիւնը յայտարարած է, թէ Հալէպի մէջ զինադադարի վերականգնումը կախեալ է սուրիական զինեալ ընդդիմութենէն։