ԵՐԵՒԱՆ - Չինաստան կատարած պաշտօնական այցելութեան ծիրին մէջ Հայաստանի կրթութեան եւ գիտութեան նախարար Լեւոն Մկրտչեանի գլխաւորած պատուիրակութիւնը հանդիպում ունեցած է Պէյճինկի օտար լեզուներու համալսարանի ղեկավարութեան հետ: Հանդիպման ընթացքին նախարար Լեւոն Մկրտ-չեան բարձր գնահատած է  միջհամալսարանական կապերու ամրապնդման ու զարգացման նպատակով երկու երկիրներուն ի գործ դրած ջանքերը՝ կարեւոր նկատելով Պէյճինկի օտար լեզուներու համալսարանին մէջ հայագիտութեան կեդրոնի հիմնադրման եւ հայերէնի՝ որպէս առանձին մասնագիտութեան ուսուցման կազմակերպման կարելիութիւնը:

Նախարարը միաժամանակ ընդ-գծած է Երեւանի Վ. Պրիւսովի անուան պետական  լեզուահասարակագիտական համալսարանին մէջ ծաւալած գործունէութիւնը Կոնփուկիոսի կեդրոնին, որ մասնաճիւղեր ունի նաեւ Երեւանի պետական համալսարաններուն եւ Հայ-ռուսական (սլաւոնական) համալսարանին մէջ:

Նկատի առնելով  չինական լեզուին եւ մշակոյթին հանդէպ Հայաստանի մէջ առկայ մեծ  հետաքրքրութիւնը՝ Լեւոն Մկրտչեան անդրադարձած է Հայաստանի մարզերուն մէջ կեդրոնի մասնաճիւղեր բանալու կարելիութեան:

Պէյճինկի օտար լեզուներու համալսարանի ղեկավարութեան անունով փոխնախագահ Եէն Կուոհուան իր երախտագիտութիւնը յայտնած է Հայաստանի կրթութեան եւ գիտութեան նախարար Լեւոն Մկրտչեանին՝  ընդգծելով, որ պատմականօրէն կրթական եւ գիտական մեծ ներուժ ունեցող Հայաստանի հետ գործընկերային յարաբերութիւններու զարգացումը միացեալ նախագիծերու նոր հորիզոններ կը բանայ:

Հանդիպման ընթացքին պայմանաւորուածութիւն ձեռք բերուած է երկու երկիրներու օտար լեզուներու համալսարաններու շրջանաւարտներուն Հայաստանի եւ Չինաստանի պետական նմոյշի վկայականներ տրամադրելու ուղղութեամբ:

Նախարար Մկրտչեանի գլխաւորած պատուիրակութիւնը հանդիպում ունեցած է նաեւ Պէյճինկի մանկավարժական համալսարանի նախագահ Տոնկ Ցինի հետ: Քննարկուած են երկու երկիրներու մանկավարժական համալսարաններուն միջեւ կրթական համագործակցութեան զարգացման՝ մասնաւորապէս ուսանողներու եւ դասախօսներու փոխանակման, գիտակրթական միացեալ ծրագիրներ իրականացնելու կարելիութիւնները:

Նախատեսուած է նաեւ հանդիպում Հայաստանի եւ Չինաստանի կրթութեան եւ գիտութեան նախարարներուն միջեւ, որոնք պիտի քննարկեն երկու երկիրներուն միջեւ կրթութեան եւ գիտութեան ոլորտներուն մէջ համագործակցութեան ընդլայնման, երկկողմանի կապերու ամրապնդման հարցեր: