ՄԱԿ, <<Ռոյթըրզ>> - ՄԱԿի Ապահովութեան խորհուրդի անդամները Դեկտեմբեր 5ի երեկոյեան դռնփակ ժողով մը գումարեցին՝ քննարկելու համար բանաձեւ մը, որ կոչ կ՛ընէր Հալէպի մէջ եօթնօրեայ զինադադար հաստատելու: Սակայն, Ռուսիա եւ Չինաստան վեթոյի ենթարկեցին բանաձեւը՝ զայն անտեղի համարելով:

ՄԱԿի մօտ Ռուսիոյ ներկայացուցիչ Վիթալի Չուրքին յայտարարեց, որ պէտք է յետաձգել Հալէպի վերաբերեալ նախագիծին շուրջ քուէարկութիւնը մինչեւ ռուս-ամերիկեան խորհրդակցութիւններու աւարտը՝ նշելով, որ այդ նախագիծը չի նպաստեր Հալէպէն ահաբեկիչներու դուրս բերման:

Իր կարգին, Ռուսիոյ արտաքին գործոց նախարար Սերկէյ Լաւրով յոյս յայտնեց, որ մօտ օրէն կը կայանայ Հալէպի հարցով ռուս-ամերիկեան համաձայնութիւնը: Ան շեշտեց, որ համաձայնութիւնը պէտք է ներառէ բոլոր զինեալներուն Հալէպէն հեռացումը, իսկ հեռանալ մերժողները պէտք է նկատել ահաբեկիչներ։ Ան աւելցուց, որ իր երկիրը պիտի աջակցի արեւելեան Հալէպի մէջ մնացող ընդդիմադիր զինեալներուն դէմ Սուրիոյ բանակի գործողութեանց:

Բացատրելով ՄԱԿի բանաձեւը վեթոյի ենթարկելու որոշումը՝ Լաւրով յայտնեց, որ ներկայիս զինադադար հաստատելը պիտի ամրապնդէ զինեալներուն դիրքերը եւ վնաս պիտի հասցնէ Հալէպի կացութեան լուծում մը գտնելու ջանքերուն: <<Ամերիկացիներուն հետ զինեալներու հեռացման շուրջ համաձայնութիւն գոյացնելէ ետք կը համաձայնինք զինադադարի հաստատման շուրջ>>, շեշտեց Լաւրով:

Միւս կողմէ, Միացեալ Նահանգներու արտաքին գործոց նախարար Ճան Քերի յայտնեց. <<Սուրիոյ մէջ քաղաքացիական պատերազմը վերջ պիտի գտնէ միայն այն ատեն, երբ ընդդիմադիր ուժերը ներառնուին պետութեան հաստատութիւններուն մէջ: Սուրիական հարցը զինուորական լուծում չունի, եւ պատերազմը պիտի չաւարտի, եթէ Հալէպը չդադրի տագնապի կողմերուն միջեւ զինուորական ռազմավարական կռուախնձոր մը ըլլալէ>>: