ՊԷՅՐՈՒԹ, <<Ազդակ>> - Ֆրանսայի նախագահութեան ծայրայեղ աջակողմեան թեկնածու Մարին Լը Փեն Փետրուար 21ին աւարտեց Լիբանան իր այցելութիւնը, շարք մը հանդիպումներ ունենալէ ետք լիբանանցի ղեկավարներու հետ:

Ան նախ այցելեց նախագահ Միշել Աունին եւ անոր հետ խորհրդակցեցաւ Լիբանան ապաստանած սուրիացի գաղթականներուն ու անոնց ներկայութեան քաղաքական, ընկերային ու տնտեսական հետեւանքներուն շուրջ՝ ընդգծելով, որ Լիբանան անզօր է երկար ատեն դիմանալու այս բեռին տակ:

Ան նաեւ անջատ հանդիպումներ ունեցաւ մարոնիներու Պշարա Ռայի պատրիարքին եւ Լիբանանեան ուժեր կուսակցութեան ղեկավար Սամիր Ժաաժաայի հետ:

Իր տեսակցութիւններուն աւարտին, Լը Փեն տուաւ մամլոյ ասուլիս մը, որուն վայրը պարտադրաբար փոխուեցաւ, մօտաւորապէս 30 տարիներէ ի վեր Ֆրանսայի մէջ արգելափակուած լիբանանցի Ժորժ Իպրահիմ Ապտալլայի զօրակիցներու բողոքի ցոյցին պատճառով:

Իր մամլոյ ասուլիսին ընթացքին ան շեշտեց Լիբանանին օժանդակելու անհրաժեշտութիւնը՝ կոչ ընելով, որ առնչակից երկիրներ եւս նպաստեն ահաբեկչութեան դէմ պայքարին գծով, որուն սպառնալիքներէն զերծ չէ Լիբանանը:

Լը Փեն դիտել տուաւ, որ <<Իսլամական պետութիւն>> ահաբեկչական կազմակերպութեան սպառնալիքին դէմ լուծման ելք կարելի է գտնել նաեւ՝ Սուրիոյ նախագահ Պաշշար Ասատի հետ գործակցելով: Լը Փեն իր այս կեցուածքը հիմնաւորեց նշելով, որ անիկա կը միտի պաշտպանել Ֆրանսայի շահերը:

Միւս կողմէ, Լը Փեն <<կնոջ կողմէ նուաստացումի եւ ենթակայութեան>> նշան որակեց լաչակի գործածութիւնը, զոր ան մերժեց կատարել, որուն իբրեւ հետեւանք՝ սիւննի միւֆթի շէյխ Ապտելլաթիֆ Տըրիանի հետ անոր ծրագրուած հանդիպումը չկայացաւ:

Իր կարգին, <<Տար Ֆաթուա>>ն հաղորդագրութեամբ մը ցաւ յայտնեց, որ ֆրանսացի հիւրը անտեսած էր լիբանանեան հոգեւոր այս կառոյցին աւանդութիւնները: