ՈՒԱՇԻՆԿԹԸՆ, <<Էյ.Փի.>> - Միացեալ Նահանգներու արտաքին գործոց նախարարութիւնը յայտարարեց, որ Միացեալ Նահանգները մտադիր է Ռաքքան <<Իսլամական պետութեան>> զինեալներէն ազատագրել՝ միջազգային դաշինքի գործընկերներուն հետ գործակցաբար: <<Կը շարունակենք Ռաքքայի ազատագրման յաջորդող հանգրուանը ծրագրել՝ դաշինքի անդամ մեր դաշնակիցներուն հետ, մասնաւորաբար՝ Թուրքիոյ հետ>>, նշեց նախարարութիւնը՝ փորձելով մեղմացնել Ուաշինկթընի եւ Սուրիոյ քիւրտերուն գործակցութեամբ Ռաքքան գրաւելու ջանքերուն նկատմամբ Անգարայի մտավախութիւնները:

Նախարարութիւնը նաեւ յայտարարեց, որ Ռուսիա պիտի չմասնակցի Մարտ 22ին Ուաշինկթընի մէջ նախատեսուած եւ 68 երկիրներու մասնակցութեամբ կայանալիք՝ <<Իսլամական պետութեան>> դէմ պայքարի ժողովին, որովհետեւ Ռուսիա մաս չի կազմեր ամերիկեան ղեկավարութեամբ միջազգային դաշինքին:

Միւս կողմէ, քրտական ղեկավարութեամբ՝ Սուրիոյ ժողովրդավարական ուժերու բանբեր Թալալ Սիլօ յայտնեց, թէ իրենց մօտ ամերիկեան ուժերուն ամրապնդումը հետեւանք է Միացեալ Նահանգներու նախագահ Տանըլտ Թրամփի՝ անցեալ ամիս յայտարարած Ռաքքան ազատագրելու ծրագիրին: Սիլօ <<Շարք Աուսաթ>> օրաթերթին ըսաւ, որ իրենց տեսած սպառազինութիւնը զրահապատ մեքենաներ են, իսկ ամերիկացիները յայտարարած են նաեւ շրջանին մէջ նոր հրետանիներու տեղակայման մասին: Ան ըսաւ, որ այդ աջակցութիւնը պիտի շրջէ Ռաքքայի մէջ ուժերու հաւասարակշռութիւնը եւ պիտի արտօնէ, որ քաղաքին մեկուսացումը արագանայ:

<<Նախապէս կը գանգատէինք աջակցութեան սակաւութենէն: Այսօր հարցը փոխուած է, եւ Ռաքքայի վրայ վերահսկողութեան հաստատումը դարձած է մօտալուտ>>, աւելցուց Սիլօ: