ԵՐԵՒԱՆ, <<Նիուզ>> - Սպանական EFE գործակալութեան հետ ունեցած հարցազրոյցին ընթացքին, Հայաստանի նախագահ Սերժ Սարգսեան յայտնած է, որ Թուրքիա չէ վաւերացուցած հայ-թուրքական արձանագրութիւնները, եւ այսօր Երեւանի ու Անգարայի միջեւ յարաբերութիւնները կախուած են Հայաստանի եւ Ատրպէյճանի յարաբերութիւններէն:

Հայաստանի մէջ եւ ամբողջ աշխարհի տարածքին Ցեղասպանութեան 100ամեակին նուիրուած ձեռնարկները նպաստա՞ծ են հայ-թրքական յարաբերութիւններու սրման: Այս հարցումին պատասխանելով՝ նախագահ Սարգսեան ըսած է. <<Մենք հակաթուրքական հիստերիա բարձրացնելու նպատակ չենք հետապնդել: Այո՛, մենք քննադատել ենք թուրքական իշխանութիւններին՝ նրանց վարած ժխտման քաղաքականութեան պատճառով: Մենք չենք մեղադրում թուրք ժողովրդին: Մենք կարծում ենք, որ ժխտումը յանցագործութեան շարունակութիւն է, որ անպատժելիութիւնն ու ժխտումը յանգեցնում են նոր յանցագործութիւնների: Մենք պայքարում ենք ոչ միայն Հայոց Ցեղասպանութեան միջազգային ճանաչման համար, այլեւ բոլոր ցեղասպանութիւնների դէմ>>:

Նախագահ Սարգսեան մատնանշած է, որ 2008ին ինքն էր Թուրքիոյ հետ հաշտեցման գործընթացը նախաձեռնողը:

Նախագահը շարունակած է իր խօսքը՝ ըսելով. <<Մենք երկար ենք բանակցութիւններ վարել ու երկու փաստաթուղթ ենք ստորագրել, եւ մենք դրանք ստորագրել ենք երեք երկրների արտաքին գործերի նախարարների ներկայութեամբ, որոնք ՄԱԿի Անվտանգութեան խորհրդի մշտական անդամներ են: Արձանագրութիւնները պէտք է վաւերացուէին Հայաստանի ու Թուրքիայի խորհրդարանների կողմից: Մենք դեռ սպասում ենք՝ երբ թուրքերը դրանք կը վաւերացնեն: Ես վստահ եմ, որ նրանք դա չեն անի, քանի որ թուրքերն արդէն յայտնել են իրենց կարծիքը, եւ այսօր Հայաստանի եւ Թուրքիայի յարաբերութիւնները կախուած են Հայաստանի եւ Ադրբեջանի միջեւ յարաբերութիւններից:

Թուրքրերը նախապայմաններ են առաջադրում: Իսկ Հայաստանը որպէս նախապայման չի քննարկում Թուրքիայի կողմից Հայոց Ցեղասպանութեան ճանաչումը: Այսպիսով, մենք պատրաստ չենք ընդունել թուրքական կողմի առաջադրած նախապայմանները:

<<21րդ դարում պետութիւնները պէտք է յարաբերութիւններ ունենան: Մենք կարծում ենք, որ խնդիրները, որոնք գոյութիւն ունեն երկու երկրների միջեւ, կարող են քննարկուել՝ դիւանագիտական յարաբերութիւնների հաս-տատումից յետոյ>>: