By Asbarez | Friday, 17 March 2017
ՊՈԼԻՍ - Թրքական <<Հիւրրիյէթ>> թերթը կը հաղորդէ, որ Եւրոխորհուրդի նախագահ Տոնալտ Թուսք յայտարարած է, թէ Թուրքիոյ կողմէ Հոլանտային ուղղուած մեղադրանքները՝ <<կապ չունին իրականութեան հետ>>:
<<Ռոթերտամը, որ քանդուած էր նացիներուն կողմէ, այժմ ունի քաղաքապետ մը, որ ծնած է Մարոք: Եթէ մէկը Ռոթերտամի մէջ ֆաշականութիւն կը տեսնէ, ապա ուրեմն բոլորովին անջատուած է իրականութենէն>>, Եւրոխորհուրդի լիագումար նիստին ընթացքին ըսած է Թուսք:
Իր կարգին, Եւրոյանձնաժողովի նախագահ Ժան-Քլոտ Եունքեր անթոյլատրելի համարած է Թուրքիոյ կողմէ Գերմանիոյ եւ Հոլանտայի հասցէին կատարուած մեղադրանքները:
<<Ոչ թէ Եւրոմիութիւնն է, որ կը միանայ Թուրքիոյ, այլ Թուրքիա՛ն կը միանայ Եւրոմիութեան>>, յիշեցուցած է Եունքեր:
Միւս կողմէ, Միացեալ Նահանգներու արտաքին գործոց նախարարութեան բանբեր Մարք Թոնըր կոչ ըրած է Հոլանտային եւ Թուրքիոյ, որ իրենց միջեւ գոյացած լարուածութիւնը յաղթահարեն փոխադարձ յարգանքով: Ան երկու կողմերուն կոչ ըրած է խուսափելու լարուածութիւնը սրող յայտարարութիւններէ:
Վերջին օրերուն, եւրոպական կարգ մը պետութիւններու հետ իր յարաբերութիւններուն մէջ ստեղծուած լարուած իրավիճակի խորապատկերին վրայ, Անգարա կրկին օրակարգի բերաւ Եւրոմիութեան ուղղեալ՝ վիզայի դրութիւնը ջնջելու մասին իր պահանջը։
Արդարեւ, արտաքին գործոց նախարար Մեւլուտ Չաւուշօղլու յայտարարեց, որ եթէ Եւրոմիութիւնը Թուրքիոյ քաղաքացիներէն մուտքի արտօնութիւն պահանջելու դրոյթը չջնջէ, ապա Թուրքիա <<յստակ քայլեր պիտի առնէ>>՝ գաղթականներու մասին համաձայնագիրը վերատեսութեան ենթարկելու ուղղութեամբ։ <<Մեր համբերութիւնը անսպառ չէ՛>>, ազդարարած է ան եւ աւելցուցած. <<Եւրոպա հետզհետէ դէպի անդունդ կ՛երթայ>>։
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ