ՍԷՈՒԼ, <<Ռոյթըրզ>> - Հիւսիսային Քորէա, անցած շաբաթավերջին, երկու շաբթուան ընթացքին երրորդ անգամ ըլլալով հրթիռի փորձարկում կատարեց: Նախորդ երկու փորձերը կատարուած էին Մայիս 14ին եւ 21ին:

Հրթիռը արձակուած է Հիւսիսային Քորէայի արեւելեան ծովափի Վոնսան քաղաքի մօտերէն: Ճափոնցի եւ ամերիկացի պաշտօնատարներու տուեալներով՝ հրթիռը 6 վայրկեան տեւած իր թռիչքի ընթացքին կտրած է 450 քիլոմեթր տարածք եւ ինկած է Ճափոնական ծովուն մէջ, Ճափոնի Սիմանէի շրջանի Օքի կղզիներէն 300 քիլոմեթր հեռաւորութեան վրայ:

Հրթիռը հասած է մինչեւ 100 քիլոմեթր բարձրութեան: Անոր փորձարկումէն ետք, Ճափոնի վարչապետ Սինճօ Ապէ իր երկրի Ապահովութեան խորհուրդը հրաւիրած է արտակարգ նիստի եւ խոստացած՝ <<Հիւսիսային Քորէան զսպելու համար, Միացեալ Նահանգներու հետ շօշափելի քայլերու ձեռնարկել>>:

Հարաւային Քորէայի արտաքին գործոց նախարարութիւնը դատապարտեց հրթիռին փորձարկումը՝ զայն նկատելով ՄԱԿի Ապահովութեան խորհուրդի որոշումներու <<բացայայտ խախտում>>, եւ խոստացաւ՝ <<խիստ միջոցներ>>ու ձեռնարկել Հիւսիսային Քորէայի դէմ:

Հիւսիսային Ամերիկայի օդային տարածքի պաշտպանութեան հրամանատարութիւնը իր կարգին յայտնեց. <<Հիւսիսային Քորէայի արձակած հրթիռը ամերիկեան հողամասերուն վտանգ չի ներկայացներ>>:

Միացեալ Նահանգներ, սակայն, սկսած է Չինաստանի հետ քննարկելու Ապահովութեան խորհուրդին կողմէ նոր որոշումի մը որդեգրումը՝ աւելցնելով, որ Փիոնկեանկի գլխաւոր դաշնակից Չինաստանը եւս կը գիտակցի, թէ բանակցութեանց ճամբով Հիւսիսային Քորէայի սպառազինման ծրագիրը դադրեցնելու ժամանակը սահմանափա՛կ է:

Միացեալ Նահանգներու նախագահ Տանըլտ Թրամփ եւս դատապարտեց հեթիռին արձակումը։