2 յունիս 2017-ին նախագահ Սերժ Սարգսեան ընդունած է Գերմանիոյ Ընկերվար-ժողովրդավարական կուսակցութեան նախագահութեան անդամ, Գերմանիոյ խորհրդարանի պիւտճէի հարցերով յանձնախումբի փոխնախագահ Տիթմար Նիթանը:

Հանրապետութեան նախագահը ողջունած է հիւրը, բարձր գնահատած անոր գործունէութիւնը հայ-գերմանական երկկողմանի յարաբերութիւններու ամրապնդման գործին մէջ եւ շնորհակալութիւն յայտնած Հայոց ցեղասպանութեան ընդունման ու դատապարտման ուղղութեամբ անոր հետեւողական ջանքերուն համար: <<Յարգելի՛ պարոն Նիթան, Հայաստանի մէջ քաջածանօթ են ձեր գործունէութեան, յատկապէս ինչ կը վերաբերի պատմական արդարութեան վերականգնման եւ իրերը իրենց անունով կոչելու ձեր ջանքերուն: Ձեր պարագային ատիկա աւելի քան գնահատելի է, որովհետեւ դուք, ըլլալով Գերմանիա-Թուրքիա յարաբերութիւններու զարգացման կողմնակից, այսուհանդերձ, շատ յստակօրէն ձեր ձայնը բարձրացուցիք եւ  պայքարեցաք, որ Գերմանիան ճանչնայ Հայոց ցեղասպանութեան փաստը` այդպիսով ձեր ներդրումը ունենալով ընդդէմ ցեղասպանութիւններու, մարդկութեան դէմ յանցագործութիւններու  կանխարգիլման համամարդկային պայքարին մէջ>>, ըսած է հանրապետութեան նախագահը:

Հանդիպումին ընթացքին նախագահ Սարգսեան Հայոց ցեղասպանութեան միջազգային ճանաչման գործին մէջ ներդրած նշանակալի աւանդին համար Գերմանիոյ խորհրդարանի երեսփոխան Տիթմար Նիթանը պարգեւատրած է Մխիթար Գոշի մետալով:

Տիթմար Նիթան հանրապետութեան նախագահէն շնորհակալութեամբ ընդունելով բարձր պարգեւը` մէջբերած է յայտնի ցեղասպանագէտ Էլի Վիզելի խօսքերը` <<Ով որ կը մոռնայ զոհերը` զանոնք կը սպաննէ երկրորդ անգամ>>, եւ ընդգծած, որ, իր համոզումով, բոլորը պէտք է ջանան ներդրում ունենալ աշխարհին մէջ խաղաղութեան, փոխըմբռնման, հաշտութեան հաստատման եւ արդարութեան վերականգնման գործին մէջ: Ան վստահեցուցած է, որ ամէն ինչ պիտի ընէ, որպէսզի իր ջանքերը կէս ճամբուն չմնան, եւ հայ ժողովուրդին դէմ իրականացուած Ցեղասպանութիւնը երբեք չմոռցուի:

Հանրապետութեան նախագահը յաջողութիւն մաղթած է Տիթմար Նիթանին եւ յոյս յայտնած, որ ան իր աշխուժ գործունէութեամբ շարունակէ ամրապնդել Հայաստանի եւ Գերմանիոյ միջեւ գոյութիւն ունեցող բարեկամական յարաբերութիւնները: