By Asbarez | Thursday, 22 June 2017
ՊՐԻՒՔՍԷԼ, <<Ա.Էֆ.Փէ.>> - Եւրոխորհրդարանի Արտաքին յարաբերութիւններու յանձնախումբը Յունիս 20ին վաւերացուց բանաձեւ մը, որ Եւրոմիութեան կոչ կ՛ընէ պաշտօնապէս կասեցնելու Թուրքիոյ հետ անդամակցութեան բանակցութիւնները, եթէ նախագահ Էրտողանին յաւելեալ լիազօրութիւններ շնորհող սահմանադրական փոփոխութիւնները գործադրուին առանց բարեփոխումներու:
Յանձնախումբը նաեւ սուր կերպով քննադատեց անցեալ տարուան յեղաշրջումի ձախող փորձէն ետք Անգարայի իշխանութեանց հակաժողովրդավարական գործողութիւնները, յեղաշրջումի փորձին դէմ Անգարայի հակազդեցութիւնը նկատեց <<անհամաչափ>>:
Յանձնախումբը անգամ մը եւս Թուրքիոյ կոչ կ՛ընէ իր ուժերը գրաւեալ Կիպրոսէն հեռացնելու, հոն գաղութատիրական գործունէութիւնը դադրեցնելու եւ Ֆարոշա քաղաքը վերադարձնելու ՄԱԿի վերահսկողութեան տակ: Յանձնախումբը Անգարայի կոչ կ՛ուղղէ <<յարգելու բոլոր անդամ երկիրներու գերիշխանական իրաւունքները, ներառեալ բնական հարստութիւններու պեղման ու օգտագործման իրաւունքը, ըստ միջազգային օրէնքի>>:
Կ՛ակնալուի, որ բանաձեւը Եւրոխորհրդարանի լիագումար նիստին ընթացքին քննարկուի Յուլիսի նստաշրջանին։
Յիշեցնենք, որ Էրտողան յայտարարած էր, որ պիտի քննարկուի Թուրքիոյ մէջ մահապատիժը վերականգնելու հարցը։ Այս քայլն ալ հիմնովին ներհակ է Եւրոմիութեան գաղափարներուն։
Միւս կողմէ, <<Միլլիյէ>>չ թերթը հաղորդած է, որ Եւրոմիութեան ընդարձակման հարցերով յանձնակատար Եոհանս Հան Թուրքիա պիտի այցելէ Յուլիս 6ին։ Ան վերջին անգամ Թուրքիա այցելած էր Սեպտեմբեր 2016ին։
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ