By Asbarez | Thursday, 27 July 2017
ՈՒԱՇԻՆԿԹԸՆ, <<Ռոյթըրզ>> - Միացեալ Նահանգներու նախագահ Տանըլտ Թրամփ Յուլիս 25ի յետմիջօրէին, Սպիտակ տան մէջ ընդունեց Լիբանանի վարչապետ Սաատ Հարիրին, որուն հետ քննարկեց շարք մը հարցեր: 45 վայրկեան տեւած հանդիպումէն ետք, Թրամփ եւ Հարիրի միացեալ մամլոյ ասուլիսի մը ընթացքին կատարեցին շարք մը յայտարարութիւններ:
Թրամփ նշեց, որ Լիբանան կը գտնուի <<Իսլամական պետութեան>>, <<Քայիտա>>ի, <<Ճապհաթ Նուսրա>>ի եւ <<Հըզպալլա>>ի դէմ պատերազմի առաջնագիծին վրայ եւ շեշտեց, որ Լիբանանի կառավարութիւնը պատասխանատու է լիբանանցիներու ապահովութեան երաշխաւորման:
Այս շրջագիծին մէջ, Թրամփ շնորհաւորեց լիբանանցիներուն գոյատեւելու կամքը՝ բարձր գնահատելով լիբանանեան–ամերիկեան պատմական յարաբերութիւնները:
Ան դրուատեց լիբանանեան բանակին կողմէ երկրի խաղաղութեան պահպանումն ու երկրի սահմաններուն պաշտպանութիւնը, եւ նշեց, թէ Միացեալ Նահանգներ <<հպարտ է>> ահաբեկչութեան դէմ մղուած այս պայքարին զօրակցելով:
<<Լիբանան կարիքը ունի միայն իր բանակին, իսկ <<Հըզպալլա>> կը սպառնայ լիբանանեան պետութեան եւ ամբողջ շրջանին, յատկապէս՝ զինուելով եւ Իսրայէլի դէմ պատերազմ յայտարարելով: Թէեւ <<Հըզպալլա>> ինքզինք կը ներկայացնէ իբրեւ լիբանանցիներու շահերու պաշտպան, սակայն խորքին մէջ ան իր սեփական եւ Իրանի շահերը կը պաշտպանէ>>, պնդեց Թրամփ:
Անդրադառնալով սուրիացի տեղահան եղածներու հարցին՝ Թրամփ շնորհակալութիւն յայտնեց Լիբանանին, որ հիւրընկալած է մեծ թիւով տեղահանուածներ. ան աւելցուց, որ Միացեալ Նահանգներ պիտի շարունակէ օժանդակել Լիբանանին: <<Կը խոստանամ օժանդակել սուրիացի տեղահանուածներու մարդկային կարիքներուն, եւ յարմար կը գտնեմ, որ լաւագոյն ձեւը իրենց երկրին մօտ մնալն է>>, ըսաւ Թրամփ:
Ան նաեւ շեշտեց, որ մօտ ապագային պիտի յայտարարէ <<Հըզպալլա>>ի դէմ պարտադրուելիք պատժամիջոցներուն մասին իր որոշումը:
Իր կարգին, Հարիրի շեշտեց, որ հանդիպումին ընթացքին շնորհակալութիւն յայտնած է Լիբանանի քաղաքական եւ տնտեսական կայունութիւնը պահպանելու իմաստով թափուած ամերիկեան ջանքերուն համար: Ան նշեց, որ ՄԱԿի խաղաղապահ ուժերը կը պահպանեն հարաւային Լիբանանի ապահովական կայունութիւնն ու սահմանային խաղաղութիւնը՝ աւելցնելով, որ Լիբանանի կառավարութիւնը յանձնառու կը մնայ ՄԱԿի Ապահովութեան խորհուրդի թիւ 1701 բանաձեւի գործադրութեան:
Հարիրի նաեւ յայտնեց, որ Թրամփի հետ քննարկած է Լիբանան հասած սուրիացի տեղահանուածներուն ձգած հետեւանքները՝ Լիբանանի վրայ, եւ անոր ներկայացուցած է տեղահանուածներուն հարցը լուծելու շուրջ Լիբանանի կառավարութեան պատկերացումը:
Հարիրի իր յայտարարութիւնները եզրափակեց՝ հաստատելով, որ լիբանանեան բանակին տրամադրուող ամերիկեան զինուորական օժանդակութիւնը պիտի շարունակուի։
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ