ԵՐԵՒԱՆ, <<Նիուզ>> -  Կաշառակերութեան դէմ պայքարի պետութիւններու խումբը (GRECO) նոր զեկոյց մը հրապարակած է, ուր գնահատուած է Հայաստանի կողմէ խորհրդարանի անդամներու, դատաւորներու եւ դատախազներու համակարգի կաշառակերութեան կանխարգիլման վերաբերեալ նախապէս ներկայացուած առաջարկութիւններու իրականացումը:

GRECO-ի փորձագէտները եզրակացուցած են, որ Հայաստան բաւարար չափով կատարած է ներկայացուած 18 առաջարկներէն 5ը: Մնացած առաջարկներէն 12ը մասամբ իրականացած է, մէկը չէ իրականացած:

Ինչ կը վերաբերի խորհրդարանի անդամներուն, ապա GRECO-ն կը նշէ, որ յառաջընթաց արձանագրուած է խորհրդարանին մէջ օրէնսդրական գործընթացի թափանցիկութեան եւ անհամատեղելիութեան չափանիշներու ներդրման ուղղութեամբ:

Սակայն կը նշուի, որ յետագայ ջանքեր կը պահանջեն խորհրդարանականներու վարքականոնի մշակման եւ խորհրդարանի անդամներու կողմէ բարոյական չափանիշներուն  եւ անոնց հետեւելու վերահսկման համակարգի ամրապնդման համար:

Ինչ կը վերաբերի դատաւորներուն, ապա GRECO-ն կ՛ողջունէ Սահմանադրական փոփոխութիւնները, որոնք նպաստած են դատական ինքնակառավարման բարեփոխման՝ Բարձրագոյն դատական խորհուրդի ստեղծման միջոցով: Բացի այդ, դատաւորներու անձեռնմխելիութիւնը կը սահմանափակուի, այսպէս կոչուած, <<գործնական անձեռնմխելիութեամբ>>:

Այնուամենայնիւ, կ՛ակնկալուի, որ աւելի շատ քայլեր ձեռնարկուին դատաւորներու յատուկ դասընթացներու եւ խորհրդատուութեան ուղղութեամբ, ինչպէս նաեւ դատաւորներու նկատմամբ ազդեցութեան ներգործման կամ կարգապահական ընթացակարգերու կիրառման դէմ երաշխիքներու ուղղութեամբ:

GRECO-ի զեկոյցը կը նշէ, որ պէտք է նաեւ արդիւնաւէտ կանոններ մշակուին աւելորդ միջամտութեանց դէմ:

GRECO-ի զեկոյցը կը նշէ, որ յառաջիկայ 18 ամիսներուն ընթացքին առաջարկութիւնները համապատասխանելի մակարդակի հասցնելու համար անհրաժեշտ է յետագայ նշանակալի յառաջընթաց ապահովել: GRECO-ն Հայաստանի պատուիրակութեան ղեկավարը հրաւիրած է մինչեւ  30 Յունիս 2019 լրացուցիչ տեղեկատուութիւն ներկայացնել անկատար առաջարկներու իրականացման վերաբերեալ: