ԵՐԵՒԱՆ, «Երկիր».- Ատրպէյճան բնակող ազգային փոքրամասնութիւններուն՝ աւարներուն, լեզգիներուն, թալիշներուն եւ ռութուլներուն, կոչ ուղղուած է չմասնակցելու ղարաբաղեան «ճակատ»ի գործողութիւններուն:
Փաստաթուղթի հեղինակները մասնաւորապէս կը նշեն. «Արդէն 20 տարիէն աւելի է մեր պատանիները վտանգի կ՛ենթարկեն իրենց երիտասարդ կեանքը եւ կը զոհուին յանուն Ատրպէյճանի շահերուն։ Կը զոհուին իրենք, կը սպաննեն մեր դարաւոր հարեւանները՝ հայերը, եւ այդ բոլորը՝ Պաքուի իշխանութիւնը մեր հայրենիքին մէջ ամրապնդելու համար: Ոչ ոք աշխարհի մէջ կրնայ մեզի բացատրել, թէ ինչո՞ւ լեզգիները, թալիշները, աւարները, ցախուրները, ուդիները եւ ռութուլները պէտք է կռուին հայկական լեռներուն մէջ: Պաքուն կը պնդէ, որ մենք պարտաւոր ենք պաշտպանել մեր հայրենիքը: Բայց միթէ Ղարաբա՞ղը մեր հայրենիքն է եւ միթէ հայե՞րը մեր թշնամիներն են»:
