By Asbarez | Wednesday, 21 February 2018
ՄՈՍԿՈՒԱ, <<Ռոյթըրզ>> - Ռուսիոյ արտաքին գործոց նախարար Սերկէյ Լաւրով Ուաշինկթընին կոչ ուղղած է՝ <<Սուրիոյ մէջ կրակի հետ խաղալէն դադրելու>>, նշելով, որ այժմ գոյութիւն ունին <<սուրիական գերիշխանութիւնը ոտնակոխելու ամերիկեան փորձեր, մասնաւորաբար՝ Եփրատի արեւելեան ափին վրայ>>, ուր Ուաշինկթըն <<Իրաքէն ու Եփրատի արեւելեան ափէն դէպի հիւսիսային Սուրիոյ ուղղութեամբ երկարող ուժ մը կը ստեղծէ>>:
Լաւրով յայտնած է, որ Մոսկուա ունի բազմաթիւ փաստեր, թէ Արեւմուտքն ու միջազգային դաշինքը <<Ճապհաթ Նուսրա>> ահաբեկչական կազմակերպութեան դէմ չեն պայքարիր: Ան ըսած է. <<Այսօր ոմանք վատ կերպով կը շահագործեն քրտական գործօնը>>:
Միւս կողմէ, Իրանի արտաքին գործոց նախարար Մոհամետ Ճաւատ Զարիֆ յայտնեց, որ Իրանն ու Ռուսիան սերտ կերպով գործակցեցան, իրականացնելու համար շրջանին մէջ կայունութեան ձգտող հասարակաց նպատակները: Ան յայտնեց, որ արդէն կարելի է խօսիլ <<Իսլամական պետութեան>> շրջանային պարտութեան մասին, մասնաւորաբար՝ Սուրիոյ եւ Իրաքի մէջ իր գրաւած հողերու կորուստէն ետք, սակայն անոր ներկայացուցած վտանգը <<կը շարունակէ գոյատեւել>> տակաւին:
Անդրադառնալով սուրիական տագնապին՝ Զարիֆ ըսաւ, որ Սուրիոյ մէջ քաղաքական լուծումը միա՛կ լուծումն է, եւ այսօր ատիկա իրագործելու յարմար առիթ գոյութիւն ունի: Խօսելով սուրիական ուժերուն կողմէ իսրայէլեան <<Էֆ. 16>> օդանաւի զգետնումին մասին՝ ան ըսաւ. <<Իսրայէլ Սուրիոյ մէջ դիրքեր ռմբակոծեց, ուստի այդ օդանաւը վար առնելը սուրիական օդային տարածքի ոտնակոխումին հակադարձութիւն է>>:
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ
