By Asbarez | Friday, 16 March 2018
ՄՈՍԿՈՒԱ, <<Ռոյթըրզ>> - Մարտ 14ին, Ռուսիոյ արտաքին գործոց նախարար Սերկէյ Լաւրով իր թուրք պաշտօնակից Մեւլուտ Չաւուշօղլուի հետ միացեալ մամլոյ ասուլիսի մը ընթացքին յայտարարեց. <<Ուաշինկթըն Սուրիոյ մէջ ռազմակայաններ կը հաստատէ, եւ անկասկած կը փորձէ երկիրը մասնատել ու յաւիտեանս հոն տեղաւորուիլ: Այժմ աշխատանք կը տարուի Արեւելեան Ղութայի մէջ քիմիական զէնքի օգտագործման սադրիչ գործողութեան մը վրայ>>:
Իր կարգին Չաւուշօղլու յայտնեց, որ Սուրիոյ մէջ դրական տեղաշարժներ կը տեսնուին՝ աւելցնելով. <<Սուրիոյ մէջ կան <<Ճապհաթ Նուսրա>>ի նման կազմակերպութիւններ, որոնց դէմ Ռուսիոյ հետ պէտք է պայքարինք: Մենք Ռուսիոյ եւ Իրանի հետ կը զօրակցինք Սուրիոյ հողային ամբողջականութեան>>։
Ան նաեւ շեշտեց, որ Միացեալ Նահանգներու արտաքին գործոց նոր նախարարը պէտք է գիտակցի, թէ պէտք է յարգե՛լ Թուրքիան:
Թուրքիոյ վարչապետ Պինալի Եըլտըրըմ իր կարգին մեկնաբանելով Ռեքս Թիլըրսընի պաշտօնազրկումը՝ ըսաւ. <<Թուրքիոյ կեցուածքը յստակ է. ան մեծ կարեւորութիւն չ՛ընծայեր, թէ նոր արտաքին գործոց նախարար Մայք Փոմփէօն ի՛նչ կը մտածէ իր մասին: Կը յուսամ, որ յառաջիկային առողջ յարաբերութիւններ կը կառուցուին>>:
Նշենք, որ թրքական <<Տեմոքրաթհապեր>> կայքը գրած էր. <<Իրանի հետ գոյացած համաձայնագիրին դէմ արտայայտուած Փոմփէօն Յուլիս 15ի զինուորական յեղաշրջման փորձին անմիջապէս յաջորդ օրը <<Թուիթըր>>ի վրայ Թուրքիան որակած էր <<ամբողջատիրական իսլամական բռնապետութիւն>>: Որոշ ժամանակ մը ետք ան ջնջած էր իր գրառումը>>:
Միւս կողմէ, Միացեալ Նահանգներու զինեալ ուժերու կեդրոնական հրամանատարութեան ղեկավար զօր. Ճոզէֆ Վոթըլ յայտարարած է, որ Ռուսիան Սուրիոյ մէջ իր քայլերով սկսած է ազդելու թուրք-ամերիկեան յարաբերութիւններուն վրայ, ինչ որ կը մտահոգէ ամերիկեան կողմը:
<<Թուրքիոյ հետ մեր յարաբերութիւններու ծիրին մէջ կ՛ուզեմ շեշտել դերը Ռուսիոյ, որ երկակի վարք կը դրսեւորէ եւ կը նպաստէ շրջանին մէջ մեր ռազմավարական գործընկերոջ հետ յարաբերութիւններու լարուածութեան աճին: Մենք անհանգստացած ենք Ռուսիոյ՝ հիւսիսային Սուրիոյ մէջ ստանձնած դերէն, ինչպէս նաեւ Թուրքիոյ հետ մեր յարաբերութիւններուն վրայ այդ բոլորին ունեցած հետեւանքներէն>>, <<Հիւրրիյէթ>> թերթի թղթակիցին ըսած է ամերիկացի զօրավարը:
Նաեւ, Աֆրինի մէջ, Սուրիոյ կառավարութեան համակիր ուժերը Մարտ 14ին հակադարձած են իրենց շարքերուն մէջ 8 զոհ պատճառած թրքական ռմբակոծումին: Ռմբակոծուած են Հալէպի հիւսիսային գիւղական շրջանի Մարեհ գիւղին մէջ գտնուող թրքական ուժերուն դիրքերը:
Թրքական հրետանին եւ օդուժը նոյն երեկոյեան դարձեալ ռմբակոծած են Աֆրին քաղաքի կեդրոնը, իսկ թրքական բանակը կը յայտարարէ, որ արդէն պաշարած է Աֆրին քաղաքը, սակայն քրտական Ժողովուրդի պաշտպանութեան ջոկատները կը հերքեն այդ պնդումը:
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ