By Asbarez | Friday, 15 June 2018
Մեծ հայրենական պատերազմի Մոսկուայի կեդրոնական թանգարանին մէջ, 14 Յունիսին կատարուեցաւ զրահահրասայլային զօրքերու գլխաւոր մարաջախտ, Խորհրդային Միութեան հերոս՝ Համազասպ Բաբաջանեանի կիսանդրիի բացումը:
Կիսանդրին թանգարանին Հայաստանի Հանրապետութեան կողմէ փոխանցեց վարչապետ Նիկոլ Փաշինեան: Ձեռնարկին ներկայ էին նաեւ վարչապետի տիկինը՝ Աննա Յակոբեանը, Ռուսիոյ մօտ Հայաստանի արտակարգ եւ լիազօր դեսպան Վարդան Տողանեան, հասարակական, մշակութային գործիչներ եւ հայ համայնքի ներկայացուցիչներ:
Ողջունելով վարչապետ Նիկոլ Փաշինեանը, դիւանագիտական եւ հասարակական գործիչները՝ թանգարանի տնօրէն Ալեքսանդր Շքոլնիք նշեց, որ Համազասպ Բաբաջանեանի կիսանդրին իր արժանի տեղը պիտի ունենայ թանգարանին մէջ:
<<Հայրենական մեծ պատերազմին հայ ժողովուրդի ներդրումը յաւերժօրէն կը մնայ պատմութեան մէջ: Պատերազմի տարիներուն, առաջնագիծին վրայ մարտնչեցան հայ ազգի հարիւր հազարաւոր տղաներ եւ աղջիկներ, որոնցմէ 70 հազարը արժանացաւ զանազան պարգեւներու: Անոնց անունները, անոնց մասին պատմող նիւթերը կրնաք գտնել մեր թանգարանին մէջ: Ամիսներ առաջ մեր թանգարանին փոխանցուեցաւ Հայրենական Մեծ պատերազմի հերոս մարաջախտ Բաղրամեանի կիսանդրին. այսօր հպարտութեամբ կը ցուցադրենք եւս մէկ հերոսի կիսանդրի: Մենք պէտք է մեր հերոսներու սխրագործութիւններուն մասին տեղեկութիւնները եւ պատմութիւնները պահպանենք ու փոխանցենք նոր սերունդին: Յատուկ շնորհակալութիւն կիսանդրիի հեղինակներուն, զայն ստեղծելու գործին մէջ ներդրում ունեցողներուն>>, ըսաւ Ալեքսանդր Շքոլնիք:
Վարչապետ Նիկոլ Փաշինեան, իր հերթին նշեց, որ Մեծ հայրենականը ծանր փորձութիւն էր խորհրդային երկիրներու բոլոր ժողովուրդներուն, ներառեալ հայ ժողովուրդին համար: Ճակատամարտ մեկնած բազմաթիւ հայեր չվերադարձան. անոնց մէջ էր իր մեծ հայրը, որուն անունը եւ մականունը կը կրէ ինք:
<<Ինծի համար մեծ պատիւ է Հայաստանի Հանրապետութեան կողմէ հերոս Համազասպ Բաբաջանեանի կիսանդրին թանգարանին փոխանցելը: Համազասպ Բաբաջանեան յայտնի է իր սխրագործութիւններով. ան մարտնչեցաւ ճակատամարտերու մէջ՝ ազատագրելով քաղաքներ, գիւղեր: Անոր սխրագործութիւնները հետք ձգած են հայոց պատմութեան մէջ: Մեր պարտքն է պահպանել եւ փոխանցել երիտասարդ սերունդին այդ մեծ գործին յիշատակը>>, ըսաւ վարչապետը: Ան ընդգծեց, որ այսօրուան հանդիսաւոր ձեռնարկը կը վկայէ, որ Հայաստան եւ Ռուսիա բարձր կը գնահատեն իրենց հերոսներն ու անոնց վերաբերեալ յիշողութիւնները պահպանելով՝ կը փոխանցեն յաջորդ սերունդներուն:
Կիսանդրիի հեղինակ Աշոտ Թադեւոսեան նշեց, որ հպարտութեան զգացումով կատարած է այս աշխատանքը եւ շատ ուրախ է, որ այսօր հերոս Համազասպ Բաբաջանեանի կիսանդրին իր արժանի տեղը կ՛ունենայ թանգարանին մէջ:
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ