By Asbarez | Monday, 27 August 2018
ԵՐԵՒԱՆ, «Էրմենիհապեր».- Գերմանական «Պիլտ» թերթին համաձայն՝ Ատրպէյճանի իշխանութիւնները արգիլած են Գերմանիոյ վարչապետ Անկելա Մերքելի Քրիստոնեայ ժողովրդավարական միութիւն կուսակցութեան պատգամաւոր Ալպերթ Վայլերի մուտքը իրենց երկիր, որովհետեւ ան Արցախ այցելած է:
Վայլեր Հայաստանէն Արցախ այցելած էր 2014ին եւ 2016ին: Ատրպէյճան զայն յայտարարած է «անբաղձալի անձ» եւ իր երկիր մուտքի արգելքի որոշումը կայացուցած է ամենաբարձր մակարդակով, ուստի, Գերմանիոյ մօտ Ատրպէյճանի դեսպանին հետ Գերմանիոյ արտաքին գործոց նախարարութեան՝ այս հարցով բանակցութիւնները ապարդիւն եղած են:
Հարաւային Կովկասի երկիրներուն հետ Գերմանիոյ յարաբերութիւններու խորհրդարանական խումբի փոխնախագահ Ալպերթ Վայլեր մաս պիտի կազմէր Կովկաս այցելող Մերքելի պատուիրակութեան:
Վայլեր մտահոգութիւն յայտնած է տարածաշրջանին մէջ տիրող իրավիճակին վերաբերեալ՝ նշելով. «Ատրպէյճան ինքզինք կը ներկայացնէ իբրեւ ժողովրդավար երկիր: Ժողովրդավարական ճանապարհով ընտրուած պատգամաւորի դէմ այդ գործողութիւնները ո՛չ մէկ կապ ունին ժողովրդավարութեան հետ»:
Պատասխանելով այս մասին հարցումներու՝ Ատրպէյճանի արտաքին գործոց նախարարութեան բանբեր Հիքմեթ Հաճիեւ ըսաւ. «Այդ պատգամաւորը անօրինական այցելութիւն կատարած է Ատրպէյճանի գրաւեալ տարածքներ եւ անոր անունը արձանագրուած է անբաղձալի անձերու «սեւ ցանկ»ին վրայ: Նման անձեր Ատրպէյճանի ինքնիշխանութեան եւ տարածքային ամբողջականութեան նկատմամբ ցուցաբերած անարգանքին համար ներողութիւն խնդրելէ ետք միայն կրնան ակնկալել, որ իրենց անունը վերցուի այդ ցանկէն»։
Յիշեցնենք, որ Վայլեր նաեւ կարեւոր դեր խաղցած էր Գերմանիոյ խորհրդարանին կողմէ Հայոց Ցեղասպանութեան ճանաչման բանաձեւին վաւերացումը ապահովելու ջանքերուն մէջ:
comments
ԵԽԽՎի Համազեկուցողները Կոչ Ըրին Պաքուին՝ Հայաստանէն Դուրս Բերելու Զօրքերը Եւ Ազատ Արձակելու Գերիները
Խրիմի Կամուրջի Պայթումին Գործով Ձերբակալուած Են 5 Մեղադրեալներ, Որոնցմէ Երեքը Հայ Են
Իրան Դարձեալ Յիշեցուց Ալիեւին, Թէ Պատմական Սահմաններու Փոփոխութիւնը Անընդունելի Է
Ալիեւ Հայաստանը Կը Զգուշացնէ Սադրանքներու Դիմելէ
Պրիւքսէլ Ուշադիր Կը Հետեւի Հայ-Ատրպէյճանական Սահմանագօտիի Կացութեան
Ատրպէյճան Կը Ծրագրէ Բերձորի Եկեղեցին Մզկիթի Վերածել
Անգարա Դատապարտեց ՄԱԿի Ընդհանուր Ժողովի Նախագահին Ծիծեռնակաբերդ Այցելութիւնը
Սուրիա Պիտի Դիմադրէ Իր Հողերուն Վրայ Որեւէ Թրքական Գործողութեան. Ասատ