ՊՈԼԻՍ.- Թրքական <<Ճիւմհիւրրիյէթ>> օրաթերթը, Ուրբաթ, Փետրուար 19ին կը հաղորդէ, թէ Թուրքիոյ կառավարութեան ընդդիմադիր Հանրապետական ժողովրդային կուսակցութեան փոխնախագահ Օնուր Էօյմեն յայտարարած է, որ Միացեալ Նահանգներու Քոնկրեսի Ներկայացուցիչներու տան կողմէ Հայկական Ցեղասպանութեան բանաձեւի վաւերացման հաւանականութիւնը մեծ է։
Էօյմեն Հինգշաբթի օր տրուած մամլոյ ասուլիսի մը ընթացքին այս իրողութեան գլխաւոր պատասխանատուն համարած է իշխող Արդարութիւն եւ բարգաւաճում կուսակցութեան որդեգրած անպատասխանատու եւ սխալ քաղաքականութիւնը:
Էօյմեն նաեւ յայտարարած է, որ իր կուսակցութիւնը միշտ դէմ եղած է Հայաստան-Թուրքիա արձանագրութիւններու ստորագրման։ Ըստ անոր, այս արձանագրութիւնները ստորագրելով՝ Թուրքիան շեղած է այն ուղիէն, որուն վրայ էր վերջին 17 տարիներու ընթացքին։
Միւս կողմէ, թրքական <<Ռատիքալ>> օրաթերթը կը հաղորդէ, թէ Թուրքիոյ արտաքին գործոց նախարար Ահմետ Տաւութօղլու Իրան իր այցելութենէն վերադարձին, Միացեալ Նահանգներու արտաքին գործոց նախարար Հիլըրի Քլինթընի ներկայացուցած է այցելութեան մանրամասնութիւնները։ Անոնք նաեւ քննած են Հայաստան-Թուրքիա յարաբերութիւնները։
Թուրքիոյ արտաքին գործոց նախարարը իր ամերիկացի պաշտօնակիցին ներկայացուցած է Ցեղասպանութեան բանաձեւի առնչութեամբ Անգարայի մտահոգութիւնները։
Տաւութօղլու, յայտնելէ ետք, թէ Հայաստան-Թուրքիա յարաբերութիւններու կարգաւորման գործընթացը պէտք է շարունակել, նշած է, որ Հայկական Ցեղասպանութեան բանաձեւը լուրջ վնասներ պիտի հասցնէ թուրք-ամերիկեան յարաբերութիւններուն։ <<Մենք կ՛ուզենք, որ նման նախաձեռնութիւններ դադրեցուին>>, ըսած է Տաւութօղլու։
Թուրքիոյ արտաքին գործոց նախարարը այս պատգամները փոխանցած է նաեւ Հինգշաբթի օր Անգարա այցելած Հիլըրի Քլինթընի քաղաքական հարցերու օգնական Ուիլեըմ Պըրնզի։
