Հայ Յեղափոխական Դաշնակցութեան Հայաստանի Գերագոյն Մարմնի Յայտարարութիւն

Աւարտուեցին հերթական խորհրդարանական ընտրութիւնները, որոնք նոր քաղաքական ու բարոյական փորձութիւնն էին մեր պետականութեան եւ ժողովրդի համար:

ՀՅ Դաշնակցութիւնը հանրութեանը ներկայացաւ ընտրական յստակ ծրագրով, որի կենսագործման դէպքում բոլորս կ’ապրէինք որակապես այլ երկրում: Մենք հրապարակային աշխոյժ քարոզարշաւ անցկացրեցինք,  մեր մօտեցումները հասցրեցինք ընտրողներին, արժանացանք համընդհանուր ընկալման: Շնորհակալ ենք բոլոր նրանց, ովքեր քուէարկեցին ՀՅ Դաշնակցութեան օգտին:

Ցաւօք, ընտրութիւնները չարձանագրեցին ժողովրդի կամքը եւ քաղաքական ուժերի իրական յարաբերակցութիւնը: Պարզ դարձաւ, որ համընդհանուր ընտրախախտումները ծրագրաւորուած էին եւ տեղի ունեցան տեղամասային կենտրոններից դուրս` մայիսի 6-ին եւ նախորդող օրերին: Իշխող կոալիցիայի անդամների անուան դիմաց գրանցուեցին բարձր արդիւնքներ. նախ եւ առաջ ի հաշիւ պետական եւ վարչական լծակների ամբողջական օգտագործման ու ընտրակաշառքի վերածուած աննախադէպ մեծ ֆինանսական միջոցների: Անառարկելի փաստ է, որ ընտրակաշառքը վճռորոշ ազդեցութիւն ունեցաւ ընտրութիւնների արդիւնքների վրայ:

Այս իրողութիւնը վկայում է, որ սոցիալական դժուար վիճակի մատնուած,  իրաւականօրէն անպաշտպան, պետութիւնից օտարուած հայ հասարակութեան բացարձակ մեծամասնութիւնը չկատարեց ազատ ու գիտակցուած ընտրութիւն: Ժողովրդի ապաքաղաքականացումը, աղքատութիւնն ու թշուառութիւնը ընտրակաշառքի եւ ճնշումների միջոցով ապահովեցին իշխանութիւնների վերարտադրումը:

Սա նաեւ նշանակում է, որ քաղաքական ուժերը, այդ թւում ՀՅ Դաշնակցութիւնը, դեռ չեն կարողացել մեր հասարակութեան մէջ ազատ քաղաքացու, արժանապատուօրէն ընտրութիւն կատարողի գիտակցութիւն արմատաւորել:

ՀՅ Դաշնակցութիւնը, որպէս ինքնուրոյն, յստակ սկզբունքներ դաւանող քաղաքական ուժ, ընտրական արդիւնքների առումով իր այս նահանջը սառնասրտօրէն ձեւակերպում է որպէս գործունէութեան նոր փուլի սկիզբ` համընդհանուր պայքարի շարունակութիւն մինչեւ ամբողջական իշխանափոխութիւն:

Վստահ ենք, որ վաղ թէ ուշ մեր անկախ պետութեան մէջ յաղթանակելու են ԱԶԱՏՈՒԹԻՒՆԸ, ԱՐԴԱՐՈՒԹԻՒՆԸ, ԴԱՇՆԱԿՑՈՒԹԻՒՆԸ;

ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹԵԱՆ

ԳԵՐԱԳՈՅՆ ՄԱՐՄԻՆ

08 մայիս 2012թ.