ԵՐԵՒԱՆ.- Հայաստանի նախագահ Սերժ Սարգսեան, պատասխանելով Սեւանի ափին հանգստացող <<Միասին>> երիտասարդական կազմակերպութեան անդամներու հարցումներուն՝ անդրադարձած է ղարաբաղեան բանակցութիւններուն:

<<Եթէ մի նախադասութեամբ պատասխանելու լինեմ հարցին, ապա այո, բանակցութիւնները շարունակւում են. սեղանին կան վերջին առաջարկութիւնները, որոնք մեզ առաջարկել են Ս. Պետերզբուրգում: Հիմա մենք եւ Ադրբեջանը պէտք է ասենք՝ ընդունո՞ւմ ենք դրանք՝ իբրեւ հիմք, թէ ոչ: Մենք ասում ենք, որ այդ փաստաթուղթը հնարաւորութիւն է տալիս շարունակելու բանակցութիւնները: Տեսնենք, թէ ադրբեջանցիներն ի՛նչ են ասում>>:

Նախագահը մանրամասնած է իր խօսքը յայտնելով, որ <<Մինսկի խմբի առաջարկութիւնն էր, որ 2007թ. Մադրիդեան կոչուած սկզբունքները՝ որպէս խնդրի կարգաւորման հիմք, ներկայացուեցին կողմերին: Երկու կողմերն էլ ընդունեցին, ասացին՝ այո, փաստաթուղթը հիմք է կարգաւորման համար: Եւ այս երեք տարուայ ընթացքում ընթանում են բանակցութիւններ:

<<Որպէս այդ բանակցութիւնների արդիւնք, Ս. Պետերզբուրգում Ռուսաստանի նախագահի առաջնորդութեամբ տեղի ունեցած հանդիպման ժամանակ, կողմերին ներկայացուեցին վերջին առաջարկութիւնները: Այժմ Ադրբեջանը պէտք է պատասխանի՝ ընդունո՞ւմ է արդեօք այդ առաջարկութիւնները որպէս հիմք, թէ՞ ոչ: Երբ Ադրբեջանը կ՛ասի, որ ընդունում է, այն ժամանակ կը շարունակենք բանակցութիւնները: Եթէ կ՛ասի՝ չի ընդունում, ուրեմն, այլ ելքեր, երեւի, պէտք է փնտռել:

<<Երեք սկզբունք գոյութիւն ունի. Հելսինկիի եզրափակիչ ակտի դրոյթներն են՝ տարածքային ամբողջականութիւն, ինքնորոշման իրաւունք եւ ուժի կիրառման բացառում: Քանի որ ադրբեջանական կողմը հիմնականում խօսում է տարածքային ամբողջականութեան մասին, հէնց Ալմաթիում համանախագահող երկրների արտաքին գործերի նախարարները շատ յստակ ասացին, որ որեւէ դրոյթ, որեւէ սկզբունք չի կարող գերակայ լինել միւսի նկատմամբ: Ակնյայտ է, թէ դա ում էր վերաբերւում: Եւ երկրորդ՝ շատ կոշտ խօսեցին սադրիչ յայտարարութիւնների մասին: