By Asbarez | Monday, 16 August 2010
ԵՐԵՒԱՆ, «Արմէնփրէս».- Երեւան կատարած իր այցին ընթացքին՝ Սերժ Թանքեան պիտի այցելէ նաեւ Հայկական Ցեղասպանութեան զոհերու յիշատակին նուիրուած Ծիծեռնակաբերդի յուշահամալիր, Օգոստոս 12ին լրագրողներու հետ կայացած հանդիպման մը ընթացքին ըսած է ան:
Թանքեան նշած է, իր արուեստը ունի քարոզչական բնոյթ: Ան, սակայն, չէ յստակացուցած, եթէ Ցեղասպանութեան հարիւրամեակին նուիրուած որեւէ նախագիծով կը մտադրէ հանդէս գալ: «Հարիւրամեակը կը նշուի 2015ին, եւ դժուար է հիմա ըսել, թէ ես ինչ կ՛ընեմ այդ ժամանակ», ըսած է ան՝ աւելցնելով, որ ինք երբեք չի ստեղծագործեր յստակ թեմայի մը շուրջ: «Ես կը ստեղծագործեմ բոլոր այն բաներուն մասին, զորս կը զգամ:
Առաւել՝ ես կը սիրեմ ստեղծագործել ընդհանուր նիւթերու շուրջ: Կարեւոր է, որ երաժշտութիւնը մէջէս գայ», ըսած է ան՝ նշելով, որ իր երգերուն միջոցով Ցեղասպանութեան հարցը բարձրացնելու փորձերը եղած են արդիւնաւէտ, սակայն իրականութեան մէջ անոնք ոչ թէ ծրագիր պէտք է ըլլան, այլ հոգիի ճիչ:
Անդրադառնալով իր ստեղծագործական կեանքի ձեւաւորման սկիզբին՝ ան նշած է, որ իրականութեան մէջ իր ծնողները միշտ կը յորդորէին իրեն դաշնակ կամ կիթառ նուագել, սակայն ինքը չէր համաձայներ: «Ես միայն 20 տարեկանիս սկսայ նուագել եւ երգել, ու իմ ամէնօրեայ աշխատանքիս շնորհիւ է, որ յաջողութեան հասած եմ», ըսած է ան:
Անդրադառնալով իր երգերուն ու անոնց հետ միախառնուած գոյներուն՝ Սերժ Թանքեան նշած է, որ այն երգերը, որոնք կատարած է իբրեւ «System of a down» խումբի երգիչ, նմանցուցած է սեւ, կարմիր եւ մանիշակագոյն գոյներուն, իսկ ներկայի երգերը՝ նարնջագոյնի եւ կապոյտի: «Շատ առաջարկներ կը ստանամ, որ համերգներ ունենանամ «System of a down» խումբին հետ, սակայն տակաւին յստակ ծրագիրներ չկան», ըսած է ան՝ աւելցնելով, որ ինք շատ լաւ յարաբերութիւններ ունի խումբի անդամներուն հետ:
comments
«Մաքրոն 9-10 Սեպտեմբերին Պիտի Այցելէ Երեւան Եւ Պաքու» Կ՛ըսէ «Ալֆա Նիուզ»-ի Աղբիւրը
Արցախի Ազգային Ժողովի 4 Խմբակցութիւններ Նախագահի Թեկնածու Առաջադրած Են Սամուէլ Շահրամանեանը
Երեւան-Պաքու Լարուածութիւնը Մագլցում Կ՛արձանագրէ
Ատրպէյճանի Կողմէ Առեւանգուած Երեք Ուսանողները Վերադարձուեցան Հայկական Կողմին
Մաքրոն Մտադիր Է Դիւանագիտական Նոր Նախաձեռնութեան Սկսելով Ուժեղացնել Պաքուի Վրայ Ճնշումը
Ազրպէյճանցիները Բերձորի Միջանցքի Անցակէտին Վրայ Կ՛առեւանգեն Երեք Արցախցի Երիտասարդներ
Ստեփանակերտը Կը Հերքէ Լուրերը Աղտամի Ճանապարհի Վերաբերեալ Որոշում Տալու Մասին