ԵՐԵՒԱՆ.- Բարգաւաճ Հայաստան կուսակցութեան (ԲՀԿ) ղեկավար Գագիկ Ծառուկեանի՝ նախագահական ընտրութիւններուն առաջադրուելուն մասին յայտարարութիւն մը հրապարակուած է ԲՀԿ խօսնակ Տիգրան Ուրիխանեանի կողմէ:

Սոյն յայտարարութեան մէջ կ՛ըսուի, որ «նախագահական ընտրութիւնների հետ կապուած ԲՀԿ առաջնորդի դիրքորոշման վերաբերեալ, յատկապէս վերջին շրջանում, մամուլում շատ գրուեց: Որոշ վերլուծաբաններ սեփական դատողութիւններն են անում, որոշ լրագրողներ փորձում են օր առաջ տեղեկութիւններ ձեռք բերել, եւ դա շատ նորմալ ու ողջունելի եմ համարում, քանի որ հայաստանցիներին շատ են հետաքրքրում քաղաքական իրադարձութիւնները եւ, որպէս արդիւնք, սեփական կեանքում որակական փոփոխութիւնները: Բայց արի ու տես, որ գոյութիւն ունեն մարդիկ, որոնք խաղում են հանրութեան՝ իրազեկ լինելու իրաւունքի հետ: Սեփական նեղ շահի կամ կոնկրետ իջեցուած պատուերի շրջանակներում փորձում են ուղղորդել հանրային գիտակցութիւնը, ձեւափոխում իրականութիւնն ու իրենց իսկ ստեղծածի վրայ կառուցում կեղծ վերլուծութիւններ:

«Ցանկացած դէպքում, ցանկացած քաղաքական իրադարձութեանը կամ գործընթացին մասնակցելու ո՛չ ԲՀԿն, ո՛չ էլ ԲՀԿ նախագահը չեն առաջնորդուել դիրքեր կամ պաշտօններ զբաղեցնելու «գերնպատակով»: Հարիւր հազար անգամ ասել ենք՝ մենք ունենք միայն մէկ խնդիր՝ երկրում վիճակ փոխելու, մարդկանց կեանքը բարելաւելու, զարգացող ու ամուր Հայաստան կառուցելու: Այսինքն մեր ակնկալիքները, ցանկութիւնները, պահանջները համակարգային փոփոխութիւններն են, ոչ թէ որեւէ պաշտօն կամ պաշտօններ: Ոչ ոք, ոչ մի անգամ ոչ մի ուրիշ խօսք մեզնից չի լսել: Իսկ նրանք, ովքեր իրենց ենթադրութիւններում անցնում են բոլոր սահմաններն ու ակնյայտօրէն ծառայում են ամէն բան քայքայելու նպատակ դրած, երեւի թէ ոչ միայն ներքին, այլեւ արտաքին ուժերին, որոնք փորձում են ստիպել մեզ սեփական անհիմն, կեղծ եւ սուտ իբր վերլուծութիւններով կատարել այս կամ այն գործողութիւնը, պէտք է լաւ իմանան, որ ոչ մի պրովոկացիայի (գրգռութեան-Խմբ.) չենք ենթարկուելու՝ ԲՀԿն միշտ աշխատելու է յանուն ժողովրդի բարեկեցութեան, առջեւում ընկած երկար ճանապարհին քայլ առ քայլ իրականացնելու է երկրի ու քաղաքացիների շահերից բխող գործողութիւններ: Եւ այդ ամբողջ գործունէութիւնն իրականացուելու է մեր առաջնորդի՝ Գագիկ Ծառուկեանի գլխաւորութեամբ:

Այս տողերի վրայ յատուկ հրաւիրում եմ որոշ կայքերի կամ կոնկրետ կայքի տէրերի ու իրական տէրերի ուշադրութիւնը: Խանդը, նախանձն ու արտաքին պատուէրները չեն օգնի ձեզ՝ մեր քայլերի կամ հանրային գիտակցութեան վրայ ազդելու գործում: Յատկապէս սա վերաբերում է մանր դասալիքներին ու բարոյական բաւարար միաւորներ չվաստակած ուղղակիօրէն զուլալ ջուր պղտորող մարդկանց»: