ՊԱՔՈՒ, «Ազատութիւն».- Եւրոպայի Անվտանգութեան եւ Համագործակցութեան կազմակերպութեան (ԵԱՀԿ) Մինսկի խումբի ամերիկացի համանախագահ Մէթիու Պրայզա Ուրբաթ օր «Ազատութիւն» ռատիօկայանի ատրպեճանական ծառայութեան յայտնած է, թէ Լեռնային Ղարաբաղը, «Ուշ կամ կանուխ, անմիջականօրէն կը մասնակցի բանակցութիւններուն:

Պատասխանելով բանակցային գործընթացին Լեռնային Ղարաբաղի մասնակցութեան վերաբերող հարցին՝ Պրայզա յայտնած է. «Անոնք նախապէս կը մասնակցէին բանակցութիւններուն, մինչեւ այն ատեն, երբ Հայաստանի ներկայացուցիչները որոշում կայացուցին, թէ իրենք կը ներկայացնեն ղարաբաղեան կողմը:

Ամերիկացի բարձրաստիճան դիւանագէտի գնահատումով, Ղարաբաղը բանակցային սեղան վերադարձնելու համար, պէտք է կայացուի փոխադարձ համաձայնութիւն»: Ան աւելցուցած է. «Մենք յոյս ունինք, որ այդ որոշումը կը կայացուի, եւ ինչ որ մի պահու, Ղարաբաղը բանակցութիւններուն պէտք է ուղղակիօրէն մասնակցի: Անուղղակիօրէն անոնք արդէն կը մասնակցին: Մենք կը ծանօթանանք անոնց կարծիքներուն, եւ, անշուշտ, մենք անոնց կարծիքն ալ պէտք է հաշուի առնենք բանակցութիւններուն մէջ: Հակառակ պարագային, անկարելի կը դառնայ լուծումը ընդունելի դարձնել ժողովուրդի մը համար, որուն վրայ անմիջական ազդեցութիւն պիտի ունենայ:

Այն հարցին, թէ ո՞ր կողմը պէտք է առաջին քայլը առնէ փոխադարձ համաձայնութեան ընդառաջ, Պրայզան պատասխանած է. Կառուցողական կամ նոյնիսկ ազնիւ չըլլար խօսիլ այս կամ այն կողմի՝ առաջին քայլը կատարելու մասին: Հիմնարար սկզբունքները կը յորդորեն կողմերուն միաժամանակ քայլեր ձեռնարկել:

Ինչպէս Յուլիսի սկիզբը տուած իր հարցազրոյցի մէջ յայտարարած է Ատրպէյճանի նախագահ Իլհամ Ալիեւ, խաղաղութեան համաձայնագրի ստորագրումէն ետք, 5 տարածքները՝ Ֆիզուլին, Աղդամը, Ճապրայիլը, Զանգելանը եւ Քուպաթլուն, Ատրպէյճանին կը վերադարձուին անմիջապէս, 2ը՝ Լաչինը եւ Քեալբաջարը՝ 5 տարի ետք: Այսինքն, անմիջապէս կ՛ըլլայ տարածքներու վերադարձ, բայց քանի մը շրջաններ աւելի ուշ կը վերադարձուին: Միեւնոյն ժամանակ, Ատրպէյճանը նոյնպէս քայլերու կը ձեռնարկէ: Ասիկա, յատկապէս, Ալիեւի մեկնաբանութեան մէկ մասն է՝ Հայաստանը եւ Ղարաբաղը կապող միջանցքին մասին, ինչպէս նաեւ անոր պատկերացումները կամ առաջարկները՝ կարգավիճակին վերաբերեալ:

Պրայզա աւելցուցած է, որ «Եռանախագահները նոյնպէս կը խօսին միջանկեալ կարգավիճակի մասին: Այս ամէնը պէտք է կատարուի միաժամանակ, թէեւ ընդհանուր գործընթացի որոշ տարրեր կ՛իրագործուին փուլային տարբերակով: Եթէ հարցը լուծել կ՛ուզեն, ապա կողմերը պէտք է դիմեն ռիսկի (վտանգաւոր քայլի դիմեն-Խմբ.):

Պրայզայի կարծիքով, երկու նախագահներու պարագային ալ, դժուար է համոզել իրենց ժողովուրդները, որ պէտք է դիմել ռիսկի: Միեւնոյն ժամանակ, ամերիկացի դիւանագէտի գնահատումով, անկարելի է հասնիլ համաձայնութեան, եթէ երկու երկիրներու հասարակութիւնները համաձայն չըլլան անոր:

Ըստ Պրայզայի, այս շաբաթավերջին երեք համանախագահները Լեհաստանի Քրաքով քաղաքին մէջ պիտի հանդիպին՝ կատարելու համար մատրիտեան սկզբունքները վերախմբագրելու իրենց տրուած յանձնարարականը: