ԵՐԵՒԱՆ, «Արմէնփրէս».- Հայաստանի արտաքին գործոց նախարար Էդուարդ Նալբանդեան, Յունիս 21ին Արաբական միացեալ էմիրութիւններու արտաքին գործոց նախարար Ապտալլահ Պին Զայետ ալ Նահայանի հետ համատեղ ասուլիսի մը ընթացքին, լրագրողի խնդրանքով անդրադարձած է հարաւային Կովկասի մէջ Եւրոմիութեան յատուկ ներկայացուցիչ Փիթեր Սեմնեպիի՝ «Թուրքիան յետքայլ է կատարել» յայտարարութեան, ըսելով. «Մենք յոյս ունենք, որ հայ-թուրքական յարաբերութիւնների կարգաւորման հարցում Թուրքիան յետքայլ չի արել: Մենք պատրաստ ենք գնալ յարաբերութիւններն առանց նախապայմանների կարգաւորելուն, եւ յոյս ունենք, որ Թուրքիան էլ այդ ուղղութեամբ կը գնա»:

Է. Նալբանդեան նաեւ նշած է, որ հայ-թրքական յարաբերութիւններու կարգաւորման ծիրէն ներս, Հայաստանը մտադիր է դիւանագիտական յարաբերութիւններու հաստատման՝ սահմաններու բացման ճանապարհով, թէեւ յարաբերութիւնները միայն ատով չեն սահմանափակուիր: «Յարաբերութիւնները զարգացնելու համար մտադիր ենք ստեղծել միջկառավարական յանձնաժողով, որ պիտի զբաղի կողմերը յուզող բազմաթիւ հարցերով», պարզաբանած է ան:

Անդրադառնալով Թուրքիայէն յաճախ հնչող իրարամերժ յայտարարութիւններուն՝ ԱԳ նախարարը յայտնած է, թէ իրարամերժ յայտարարութիւններով հարցեր չեն լուծուիր, եւ եթէ ցանկութիւն կայ հարցերը լուծելու դիւանագիտական միջոցներով, ապա ուրեմն հնարաւոր է զայն իրականացնել բանակցութիւններու, եւ այդ բանակցութիւններուն իբրեւ արդիւնք՝ ձեռք բերուած պայմանաւորուածութիւններուն եւ անոնց իրագործման միջոցով: «Հայ-թուրքական յարաբերութիւնների կարգաւորման ուղղութեամբ մենք այդ հնարաւորութիւնն ունենք, եւ այդ ուղղութեամբ էլ Հայաստանը շարունակելու է իր ջանքերը», նշած է Է. Նալբանդեան:
ԱՄ Էմիրութիւններու ԱԳ նախարար Նահայանը, որ Յունիս 21ի երեկոյեան Երեւանէն մեկնած է Անգարա, համատեղ ասուլիսի ընթացքին նկատած է, որ «ֆութպոլային դիւանագիտութիւնը» հետաքրքրութիւն առաջացուցած է երկու երկիրներուն միջեւ:

«Մենք ուրախ ենք, որ յարաբերութիւններու նորմալացումը ճիշդ ուղիով կ՛ընթանայ: Ես յոյս ունիմ, որ անիկա կը շարունակէ այդ ձեւով զարգանալ: Մենք կը հետեւինք եւ ուրախ պիտի ըլլանք որեւէ դրական զարգացումով: Ատիկա երկու կողմի կառավարութիւններէն ալ դժուար որոշումներ կը պահանջէ, բայց մենք կը կարծենք, որ երկու կողմերն ալ քաջութիւն պիտի ունենան եւ առնեն այդ քայլերը», յայտնած է նախարար Նահայանը: