ԵՐԵՒԱՆ, «ՓանԱրմինիըն».- Ազգային ժողովի Բարգաւաճ Հայաստան կուսակցութեան պատգամաւոր Վարդան Օսկանեան Դիմատետրի իր էջին վրայ գրած է, որ «Սիվիլիթաս» հիմնադրամին դէմ ԱԱԾի սկսած եւ աւելի քան մէկ տարի տեւած գործը արդէն աւարտած է: Արձանագրութեան մէջ գրուած է հետեւեալը.

«Վերջապէս աւարտուեց իմ դէմ սկսած եւ աւելի քան մէկ տարի տեւած անհեթեթ հետապնդումը:

«Հայաստանի Ազգային անվտանգութեան ծառայութեան՝ այսօր տարածած հաղորդագրութեան հետ կապուած ցանկանում եմ ասել հետեւեալը:

«Այս ամէնի մէջ ամենակարեւորն այն է, որ ինձ առաջադրուած «փողերի լուացման» եւ «փողերի իւրացման» երկու ծանր մեղադրանքները, ինչի արդիւնքում ինձ զրկեցին պատգամաւորական անձեռնմխելիութիւնից, յանցակազմի բացակայութեան պատճառով չեն կարողանում ապացուցել եւ ստիպուած են լինում այլ ճանապարհներով գործը կարճել:

«Ասեմ, որ ես որեւէ խոստովանութիւն չեմ արել:

«Եթէ առաջնորդուենք ԱԱԾի տրամաբանութեամբ, ապա ստացւում է, որ հնարաւոր է, օրինակ, յափշտակել պետական բիւջէի միջոցներ, դրանք համարել անձնական եկամուտ, դիմել համապատասխան պետական մարմիններին եւ խնդրել այդ գումարների մասով կատարել հարկային պարտաւորութիւնները, եւ քրէական գործը կարճուի:

«Իմ նկատմամբ քրէական գործ յարուցելու առաջին օրուանից ես ասել եմ, որ Ճոն Հանցմընի կողմից ինձ վստահուած «Սիվիլիթաս» հիմնադրամի օգտագործման համար նախատեսուած գումարից ոչ միայն ոչ մի լումայ չի չարաշահուել, այլեւ իմ կողմից այդ գումարի կառավարման արդիւնքում դրան աւելացել է աւելի քան 100 հազար տոլար:

«Իմ եւ Սիւիլիթաս հիմնադրամի դէմ սկսուած եւ աւելի քան մէկ տարի տեւած գործընթացի հետ կապուած դատողութիւնները թողնում եմ հանրութեանը»:

Մինչ այդ աւելի կանուխ Հայաստանի ԱԱԾ քննչական ծառայութիւնը Վարդան Օսկանեանի դատին վերաբերող հետեւեալ հաղորդագրութիւնը հրապարակած էր.

«ԱԱԾ քննչական ծառայութեան վարչութեան վարոյթում քննուող քրէական գործով մեղադրեալ Վարդան Օսկանեանը նախաքննական մարմնին 19.07.2013թ. դիմում է ներկայացրել, ապա այդ կապակցութեամբ ցուցմունք տուել՝ խոստովանելով, որ Ճոն Հանցմընի կողմից «Սիվիլիթաս» հիմնադրամին բացառապէս բարեգործական նպատակներով օգտագործելու համար նուիրաբերուած գումարից 250.795,26 տոլարն օգտագործել է անձնական նպատակներով՝ դա դիտարկելով, որպէս գործարքի իր մասնաբաժին:

«Միաժամանակ նա պատրաստակամութիւն է յայտնել վճարել դրանից առաջացող, հարկային մարմնի կողմից հաշուարկուած, հարկային պարտաւորութեան գումարը, մասնաւորապէս նշել է՝ «ծանօթացել եմ ինձ տրամադրուած մեղադրեալ ներգրաւելու որոշման հետ եւ այդ կապակցութեամբ յայտնում եմ.

«1. Իմ ամենամեծ թերացումն այն է, որ «Սիվիլիթաս»ի համար նախատեսուած եւ ինձ մօտ պահ տրուած գումարն ու այդ ժամանակ իմ ունեցած անձնական գումարները համարել եմ մի ամբողջութիւն: Իրօք եղել են պահեր, որ «Սիվիլիթաս» գումարն անգիտակցաբար օգտագործուել է իմ անձնականի համար: Եղել է նաեւ պահ, որ իմ անձնական գումարից փոխանցուել է «Սիվիլիթաս» հիմնադրամին: Ուստի, եթէ Հայաստանի օրէնսդրութեամբ՝ գումարը «Սիվիլիթաս»ի հաշուեկշռում առանձին չհաշուառելը, իմ հաշուեհամարի վրայ պահելը, անհրաժեշտ պահին լրացնելու եւ Հիմնադրամին վերադարձնելու նպատակով դրանից ինչ որ մաս օգտագործելը խախտում է համարւում, ես պատրաստ եմ՝ ԱԱԾի եւ ՊԵԿի մասնագէտների հետ հաշուարկ կատարել, եւ քննութեամբ ֆիքսուած 250.795,26 տոլարը համարել ինձ եկամուտ եւ կատարել դրանից բխող համապատասխան հարկային պարտաւորութիւններ:

«2. Բնականաբար, ինձ հաճելի չի եղել ներքաշուել քննութեան այս գործընթացին, բայց ես, այնուամենայնիւ, կ՛ուզէի նշել, որ իմ հանդէպ քննիչների վերաբերմունքը եղել է յարգալից եւ օրէնքի շրջանակներում:

«3. Ես բնականաբար ոչ հաշուապահ եմ, ոչ իրաւաբան եւ նախաքննութեան այս փուլում չեմ բացառում, որ եղել են հաշուապահական գործառնավարական թերացումներ, որոնք չեն հետապնդել իմ կողմից գումարի յափշտակութեան եւ դրա օրինականացման միտումնաւոր բնոյթ: Արձանագրուած խախտումների պայմաններում ես պատրաստ եմ ՀՀ օրէնքներին համապատասխան փոխհատուցել որպէս վնաս հաշուարկուած 250.795,26 տոլարից գոյացող հարկերը:

Իմ կողմից հարկային գումարի փոխհատուցման դէպքում խնդ-րում եմ՝ օրէնքով սահմանուած կարգով քրէական գործի վարոյթը կարճել եւ իմ նկատմամբ քրէական հետապնդումը դադարեցնել»:

«Վարդան Օսկանեանի դիմումի եւ ցուցմունքի հիման վրայ, ՀՀ ԱԱԾ քննչական վարչութեան պահանջով, հարկային մարմինը հաշուարկել է գործարքից նրա ստացած՝ 250.795,26 տոլարից առաջացող հարկային պարտաւորութեան գումարը, որը կազմել է՝ 20.140.324 դրամ եւ այն Վարդան Օսկանեանը 23.07.2013թ.ին ամբողջութեամբ հատուցել է պետութեանը, բացի այդ, քրէական գործի յարուցումից յետոյ, Վարդան Օսկանեանի կողմից «Սիվիլիթաս» հիմնադրամ է մուտքագրուել Ճոն Հանցմընի նուիրաբերած գումարի եւ դրա աւանդի տոկոսագումարի մնացորդը կազմող՝ 1.086.826 տոլար գումար:

«Հաշուի առնելով, որ Վարդան Օսկանեանը խոստովանել է, որ նշուած գումարը գործարքից իր մասնաբաժինն է՝ եկամուտը, որը ծախսուել է անձնական նպատակներով, այդ գումարը չի յափշտակուել եւ օրինականացուել, իսկ չվճարուած եկամտահարկը հատուցուել է պետութեանը, ուստի նախաքննութիւն իրականացնող մարմինը որոշում է կայացրել Վարդան Օսկանեանի արարքը վերաորակել, որպէս առանձնապէս խոշոր չափերով հարկերը վճարելուց չարամտօրէն խուսափելու յանցակազմ, նախատեսուած՝ Հայաստանի քրէական օրէնսգրքի 205րդ յօդուածի 2րդ մասով: Նկատի ունենալով, որ նա կամովին վերականգնել է հարկային պարտաւորութիւններից առաջացած գումարը՝ 20.140.324 դրամը եւ տուել է իր համաձայնութիւնը՝ նախաքննութեան մարմինը Հայաստանի Հանրապետութեան քրէական օրէնսգրքի 18րդ յօդուածի 5րդ մասով նախատեսուած հիմքով 24.07.2013թ. որոշում է կայացրել Վարդան Օսկանեանի նկատմամբ քրէական հետապնդումը դադարեցնելու մասին»: