Հայաստանի մաքսային միութեանը միանալու որոշման մասին Մոսկուայում յայտարարուածը որքան շրջադարձային, նոյնքան էլ Հայաստանի ապագայի համար հսկայական պատասխանատուութիւն թելադրող որոշում էր: Կարելի էր ենթադրել, որ ինչ-որ հանգրուանում, ելնելով առկայ աշխարհաքաղաքական իրավիճակից եւ զարգա­ցումներից,Հայաստանը միանալու էր իր ռազմավարական  գոր­ծընկերոջ կողմից նախա­ձեռնուած Մաքսային միութեանը եւ ներ­գրաւուելու էր Եւրասիական տնտեսական միութեան ձեւաւորման գործընթացում:

Բայց խնդիրն այն է, որ Հայաստանի Հանրա­պետութեան իշխանութիւնները մինչ այդ անհրաժեշտ տեղեկութիւն չէին փո­խանցել հասարակութեանն ու  քաղաքական ուժերին:Աւելին` որոշ յայտարարութիւններով նոյնիսկ անհնար էին համարել Հայաստանի ան­դա­մակցութիւնը ընդհանուր սահման չունեցող Մաքսային միութեանը, տարիներ շարու­նակ վարել էին բանակցութիւններ Եւրամիութեան ազատ առեւտրի գօտուն միանալու ուղղութեամբ եւ հասել ԵՄ Ասոցացման համաձայնագրի նախաստորագրման շեմին:

Կարող ենք ենթադրել, որ ՀՀ Նախագահի Մոսկուայում անակնկալ որոշման գլխաւոր պատճառը ՀՀ եւ ԼՂՀ անվտանգութեան խնդիրներն են եղել: Սա եւս պատասխա­նատուութիւն է եւ այս փուլում` ազգային-պետական հիմքերին առնչուող:

Նախագահի անակնկալ որոշումը հանրութեան մօտ բազմաթիւ հարցեր է առաջացրել:

Մեր պարագայում, ցանկացած տնտեսական ինտէգրում պէտք է յստակ երաշխիքներ տա Հայաստանի ու Լեռնային Ղարաբաղի Հանրապետութիւնների անվտանգութեան պահպանման ու ամրապնդման եւտնտե­սական համարկման եւ զարգացման համար: Մաքսային միութեանը մաս կազմելու խնդիրը եւս պէտք է պայմանաւորել այս հիմնական սկզբունքներով:

Մաքսային միութեանը Հայաստանի միանալու որոշումը չպէտք է խոչընդոտ լինիհայաստանի` Եւրոպական ուղղութեամբ աշխատանքների շարունակման եւ ծաւալման, յատկապէս` Եւրամիութեան հետ մեր երկրի հասարակական-քաղաքական ինտէգրման գործընթաց­ներին: Առաւել` Մոսկուայում կայացուած այդ որոշումը չի կարող օրակարգից հանել երկրի ներսում համա­կարգային բարեփոխումներ իրականացնելու, համատեղ ուժերով ազգային, ժողովրդավար, արդար պետութիւն ստեղծելու անհրաժեշտութիւնը:

Հայաստանի իշխանութիւններից պահանջում ենք երկրի համար նման ճակա­տագրական որոշումներ կայացնելիս տեղեկացնել հասարա­կու­թեանն ու որոշման մասնակից դարձնել քաղաքական ուժերին: Այժմ, երբ նախատեսւում է սկսել Մաքսային միութեանը մաս կազմելու գործընթաց, անհրաժեշտ է յարգել այս գործելաոճը:

ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ

04 սեպտեմբեր 2013