ՍՏԵՓԱՆԱԿԵՐՏ, «Ռադիօլուր.– Վիեննայի մէջ Հայաստանի եւ Ատրպէյճանի նախագահներու հանդիպումէն ետք հրապարակուած յայտարարութեան մէջ կը նշուի, թէ իբրեւ հետագայ քայլ՝ համանախագահները պիտի կազմակերպեն աշխատանքային հանդիպումներ նախարարներուն հետ՝ ԵԱՀԿի արտաքին գործոց նախարարութեան խորհուրդի նիստի «հարթակներուն վրայ»,  որ պիտի կայանայ 5-6 Դեկտեմբերին, իսկ համանախագահները կը ծրագրեն տարածաշրջան այցելել մինչեւ ընթացիկ տարուան աւարտը:

«Ռադիօլուր»ի լրագրող Լուսինէ Աւանէսեան կը գրէ. «Կը գա՞ն ԵԱՀԿ ՄԽ համանախագահները Ստեփանակերտ, թէ ոչ, դեռ յայտնի չէ: Բայց վստահաբար կարելի է ասել, որ եթէ Լեռնային Ղարաբաղի նախագահի հետ հանդիպում ծրագրուի, ապա այն անպայման կայանալու է Լեռնային Ղարաբաղի մայրաքաղաքում»:

Նախագահ Բ. Սահակեան՝ Հայաստանի եւ Ատրպէյճանի նախագահներու հանդիպումէն առաջ հանդիպելով երիտասարդներուն հետ անդրադարձած է 2007ին Մինսկի խումբի համանախագահներուն հետ ձեռք բերուած համաձայնութեան. «Ես հրաժարուել եմ 2007ին՝ նախագահ ընտրուելուց յետոյ, նրանց հետ հանդիպել Երեւանում եւ այդ մասին նրանց ասել եմ: Ի պատիւ նրանց՝ նրանք յարգել եւ ընկալել են իմ այդ պահանջը եւ շարունակում են լինել նաեւ Արցախում»:

Բանակցութիւններուն ներկայ հանգրուանին անդրադառնալով՝ նախագահ Սահակեան երիտասարդներուն կրկին յիշեցուցած է Լեռնային Ղարաբաղի դիրքորոշման մասին: Որոշումները ընդունելի կրնան ըլլալ, եթէ Լեռնային Ղարաբաղի Հանրապետութիւնը անոնց մասնակցի մշակման սկիզբէն, եւ ոչ թէ որոշակի հանգրուանի համար: Մատրիտեան սկզբունքներուն վերաբերեալ Լեռնային Ղարաբաղ միշտ վերապահումներ ունեցած է, եւ նախագահը վերստին հաստատած է այդ դիրքորոշումը. «Մենք դէմ ենք եւ բազմիցս դրա մասին ասել ենք»։

«Իսկ սա նշանակում է, որ Արցախում հակամարտութեան կարգաւորման հարցում նոր մօտեցումներ են ակնկալում բանակցողներից՝ այդ հարցում չնսեմացնելով ՄԽ համանախագահների դերը:  Հակամարտութեան կարգաւորման ջանքերին զուգահեռ քաղաքական այլ քայլերի մի մասն արդէն պտուղներ է տուել՝ փոխելով ԼՂՀ վերաբերեալ ընկալումները արտերկրում եւ նաեւ ճանաչման գործընթացի սկիզբը նախանշելով», կ՛եզրափակէ լրագրողը: