Մարդկային Իրաւանց Եւրոպական Դատարանը 17 Դեկտեմբեր 2013ի իր վճիռով հաստատեց, որ Հայոց Ցեղասպանութեան ժխտումը յանցագործութիւն չէ: Ըստ անոր, Լօզանի դատարանի 2007ի վճիռը՝ Թուրքիոյ բանուորական կուսակցութեան ղեկավար Տօղու Փերինչեքի դէմ, հարուած է ազատ խօսքի իրաւունքին: Փերինչեք իբրեւ ժխտողական դատապարտուած էր զուիցերիական դատարանին կողմէ:

Ֆրանսայի Հայ Դատի Գրասենեակը խստիւ կը դատապարտէ այս վճիռը, որ այնքան վտանգաւոր է եւ ուղղակի զօրակցութիւն է Եւրոպայի տարածքին Անգարայի եւ Պաքուի կողմէ ղեկավարուող ժխտողականութեան հոսանքին եւ յաւելեալ ճամբայ կը բանայ անոր դիմաց: Անգամ մը եւս պահուըտելով ազատ խօսքի իրաւունքին ետեւ՝ օրինակ առնելով Ֆրանսայի Սահմանադրական խորհուրդի մօտեցումը, եւրոպական դատարանը իր տխրահռչակ այս որոշումով կ՛ոտնահարէ Հայոց Ցեղասպանութեան զոհերուն եւ յաջորդական սերունդներուն արժանապատուութեան իրաւունքը:

Այսուհետեւ հայութիւնը, որուն այս իրաւունքը կը զլացուի, պիտի չկարենայ Եւրոպայի մէջ գտնել օրէնքով սահմանուած իր պաշտպանութիւնը: Առանց այս հիմնական իրաւունքին, ոչ մէկը կրնայ ուրեմն հաստատել, թէ ի՛նչ կրնան ըլլալ հայութեան յետագայ քայլերը եւ միջոցները՝ իրաւական ինքնապաշտպանութեան փնտռտուքի այս հոլովոյթին մէջ: Իսկ միւս կողմէ, տխրահռչակ այս որոշումը անպայմանօրէն պիտի գօտեպնդէ եւ յաւելեալ ներուժ պիտի տայ թրքական ծայրայեղական շարժումներուն ու զուգահեռաբար պիտի հարուածէ Թուրքիոյ մէջ հետզհետէ բարձրացող արդար ձայներուն:

Աւելի՛ն: Եւրոպական դատարանը յայտարարելով, որ «ցեղասպանութիւն եզրը միաձայնութիւն չի վայելեր», ուղղակիօրէն կը նոյնանայ Փերինչեքի ժխտողական այն յայտարարութեան հետ, ըստ որուն՝ «Հայոց Ցեղասպանութիւնը միջազգային սուտ մըն է»: Այս նոյնանման մօտեցումը անընդունելի է ու խստիւ դատապարտելի: Ու տակաւին, նոյնքան դատապարտելի է եւրոպական դատարանի այն զգայացունց մօտեցումը, ըստ որուն՝ «պէտք է տարբերել այս հարցը հրեաներու Ողջակիզման դէմ ժխտողականութենէն»: Ինչպէ՞ս կարելի է ընդունիլ նման տարբերակում՝ Եւրոպայի մարդկային իրաւանց բարձրագոյն դատարանին կողմէ:

Ֆրանսայի Հայ Դատի գրասենեակը, Հայ Դատի Եւրոպայի Յանձնախումբի Պրիւքսէլի Գրասենեակին հետ գործակցաբար, իր բոլոր կարողականութիւնը պիտի դնէ եւրոպական դատարանի անընդունելի այս որոշումին դէմ: Զուիցերիա երեք ամսուան ժամանակամիջոց ունի բողոքելու եւ վերատեսութեան պահանջ ներկայացնելու եւրոպական դատարանին: Այս առումով, տեսակցութիւն պահանջուած է առաջին հերթին Փարիզի մէջ Զուիցերիոյ դեսպանին հետ՝ ներկայացնելու համար մեր ակնկալութիւնները զուիցերիական իշխանութիւններէն: Համակարգուած այլ նախաձեռնութիւններ պիտի կատարուին նաեւ տարբեր երկիրներու մէջ՝ Հայ Դատի գրասենեակներու եւ յանձնախումբերու ճամբով, ինչպէս նաեւ՝ պաշտօնական Երեւանի կողմէ, միացեալ ճակատ կազմելով այս արշաւին դէմ:

18 Դեկտեմբեր 2013
ՀՅԴ ՖՐԱՆՍԱՅԻ
ՀԱՅ ԴԱՏԻ ԳՐԱՍԵՆԵԱԿ
ՀՅԴ ԵՒՐՈՊԱՅԻ
ՀԱՅ ԴԱՏԻ ՅԱՆՁՆԱԽՈՒՄԲ