ԵՐԵՒԱՆ.– ՀՅԴ «Նիկոլ Աղբալեան» ուսանողական եւ ՀՅԴ Հայաստանի Երիտասարդական միութիւնները 4 Յունուարին յայտարարած են, որ պիտի կազմակերպեն բողոքի ցոյց մը, որուն ընթացքին իրենց բողոքի ձայնը պիտի բարձրացնեն՝ զինադադարի խախտման առնչուող ԵԱՀԿ Մինսկի խմբակի համանախագահներուն դիրքորոշման դէմ՝ այս գծով Ղարաբաղեան հակամարտութեան կողմերը հաւասարապէս մեղադրելու։

Այս առիթով անոնք հրապարակած են յայտարարութիւն մը, որուն մէջ նշած են.

«Վերջերս հայ-ադրբեջանական սահմանին տեղի ունեցող միջադէպերը եւ դրանց վերաբերեալ ԵԱՀԿ Մինսկի խմբի համանախագահների վերաբերմունքն ու մեկնաբանութիւնները մտահոգութիւնների տեղիք են տալիս: Ադրբեջանական զինուժի կողմից հրադադարի պարբերաբար խախ-տման հետեւանքով մարդկային կորուստները, ինչպէս նաեւ Ադրբեջանի իշխանութիւնների ընդգծուած հակահայկական եւ ռազմատենչ յայտարարութիւնները ԵԱՀԿ Մինսկի խմբի կողմից չեն արժանանում համարժէք գնահատականի: Աւելին՝ Մինսկի խմբի համանախագահների կողմից ադրբեջանական կողմի գործողութիւնների դիտարկումը հաւասարութեան սկզբունքով ոչ միայն չի նպաստում խաղաղութեան հաստատմանը, այլեւ խրախուսում եւ միեւնոյն ժամանակ հնարաւորութիւն է տալիս Ադրբեջանին շարունակելու իր ապակառուցողական եւ տարածաշրջանի ապակայունացման քաղաքականութիւնը:

Պահանջում ենք ԵԱՀԿ Մինսկի խմբից՝ վերջ տալ կեղծ հաւասարութեան քաղաքականութեանը եւ համապատասխան գնահատական տալ Ադրբեջանի կողմից պարբերաբար սանձազերծուող ագրեսիային:

Փետրուարի 5ին՝ ժամը 12:00ին, Հայաստանի արտաքին գործերի նախարարութեան շէնքում տեղի է ունենալու արտգործնախարարի եւ ԵԱՀԿ Մինսկի խմբի համանախագահների հանդիպումը, որի կապակցութեամբ ՀՅԴ «Նիկոլ Աղբալեան» ուսանողական միութիւնը եւ ՀՅԴ Հայաստանի Երիտասարդական միութիւնը նախատեսում են բողոքի ցոյց: Ցոյցը տեղի կ՛ունենայ արտաքին գործերի նախարարութեան շէնքի դիմաց՝ ժամը 11:30ին:

Մենք կոչ ենք անում քաղաքական կուսակցութիւնների Երիտասարդական միութիւններին՝ անկախ քաղաքական դիրքորոշումից եւ մօտեցումներից, միանալ բողոքի ցոյցին եւ միասնական դիրքորոշում արտայայտել ԵԱՀԿ Մինսկի խմբի համանախագահների կեցուածքի վերաբերեալ»։