ԵՐԵՒԱՆ, «Նիուզ».– Արցախի նախագահ Բակօ Սահակեան ուղերձ յղած է՝ Արցախի վերածնունդի օրուան առիթով. ան նշած է, որ ցարդ Արցախի կտրած ուղին ճիշդ է, որդեգրած քաղաքականութիւնը կառուցողական։

Ուղերձին մէջ նախագահը ըսած է.

«Արցախի Հանրապետութեան իշխանութիւնների եւ անձամբ իմ անունից ի սրտէ շնորհաւորում եմ ձեզ Արցախի վերածննդի օրուայ առթիւ:

Փետրուարի 20ը մեր ժողովրդի պատմութեան մէջ մտաւ որպէս մի տօն, որը խորհրդանշում է արցախցիների ազատատենչ ոգին, հայրենի երկրում ազատ ու անկախ ապրելու եւ սեփական ճակատագիրն ինքնուրոյն տնօրինելու անսասան կամքը: Այդ օրինական, խաղաղ ու արդարացի պահանջին ի պատասխան Ադրբեջանը սանձազերծեց կոտորածներ ու բռնի տեղահանութիւններ եւ մեր նորանկախ պետութեանը ներքաշեց արիւնահեղ պատերազմի մէջ: Դա չափազանց ծանր ու դժուարին տարիներ էին Արցախի կեանքում: Դիմակայելով անասելի զրկանքների ու փորձութիւնների, կրելով անդառնալի կորուստներ՝ մեր ժողովուրդը պահ անգամ չերկմտեց ու չընկճուեց, այլ իր քաջ զաւակների կեանքի գնով, աշխարհասփիւռ քոյրերի ու եղբայրների միասնականութեան ու սխրանքի շնորհիւ կարողացաւ պաշտպանել հայրենի հողը: Հայրենիքի նուիրեալների յիշատակը միշտ վառ կը մնայ մեր սրտերում եւ սերունդների յիշողութեան մէջ:

Անցած տարիները եկան ապացուցելու, որ մեր ընտրած ուղին ճիշդ է ու անշրջելի: Արցախահայութիւնը շարունակում է կառուցել միջազգային նորմերին ու չափանիշներին համապատասխան ժողովրդավարական պետութիւն, շարունակում է շէնացնել գիւղերն ու քաղաքները, կառուցել նոր ճանապարհներ ու ջրատարներ, բնակարաններ ու հիւանդանոցներ, դպրոցներ ու մանկապարտէզներ, օրէցօր բարելաւել մարդկանց կենսապայմանները:

Թանկագին արցախցիներ,

Մէկ անգամ եւս շնորհաւորում եմ բոլորիս այս յիշարժան տօնի կապակցութեամբ եւ մաղթում խաղաղութիւն, քաջառողջութիւն, բարօրութիւն եւ նոր յաջողութիւններ ու յաղթանակներ՝ ի փառս մեր հերոսական ժողովրդի եւ Արցախի Հանրապետութեան»: