ԱՆԹԻԼԻԱՍ.- Ուրբաթ առաւօտեան, զինեալ ուժերու թրքական սահմանէն Քեսապ ներթափանցումի առաջին իսկ ժամերէն սկսեալ, Արամ Ա. կաթողիկոս մօտէն հետեւեցաւ ստեղծուած կացութեան եւ յատկապէս Քեսապի մեր ժողովուրդին դիմագրաւած դժուարութիւններուն: Այս ուղղութեամբ, վեհափառը կապեր հաստատեց Հալէպի, Լաթաքիոյ, Դամասկոսի եւ Լիբանանի մեր հոգեւոր, համայնքային ու քաղաքական պատասխանատուներուն հետ եւ խորհրդակցութիւններ ունեցաւ անոնց հետ:
Երբ Շաբաթ յետմիջօրէին Թուրքիայէն աւելի կազմակերպուած կերպով եւ քանի մը ճակատներու վրայ ներթափանցումներ կատարուեցան՝ սաստիկ ռմբակոծումներու թիրախ դարձնելով Քեսապը, հայրապետը անմիջապէս կապ հաստատեց պատասխանատու անձնաւորութիւններու հետ եւ պահանջեց, որ անմիջապէս առնուին պէտք եղած քայլերը՝ պաշտպանելու համար Քեսապի հայութիւնը:
Շաբաթ ուշ գիշեր, վեհափառ հօր այցելեց Լիբանանի մօտ Սուրիոյ դեսպանը: Հանդիպման ներկայ եղան ՀՅԴ Լիբանանի Կեդրոնական կոմիտէի ներկայացուցիչ Յակոբ Խաչերեան եւ Հայկական երեսփոխանական խմբակցութեան ներկայացուցիչ Յակոբ Բագրատունի: Սուրիոյ դեսպանը յայտնեց, որ Սուրիոյ նախագահին կողմէ իրեն պարտականութիւն տրուած է անմիջապէս այցելելու վեհափառ հայրապետին իրեն վստահեցնելու, թէ Սուրիոյ պետութիւնն ու բանակը իրենց կարելին պիտի ընեն վերահաստատելու շրջանին խաղաղութիւնը:
Աւելի քան ժամ մը տեւած հանդիպման ընթացքին, դեսպանը յայտնեց, որ յստակ տուեալներու համաձայն՝ Թուրքիան ո՛չ միայն քաջալերած է զինեալներու մուտքը Քեսապ, այլ նաեւ անոնց տրամադրած է ծանր զէնքեր եւ դիւրացուցած անոնց յառաջխաղացքը: Ան յայտնեց, որ սուրիական բանակը թէեւ զոհեր տուած է, սակայն կրցած է լայն չափով ետ մղել զինեալ ուժերու թափանցումները: Շարունակելով իր խօսքը՝ դեսպանը ըսաւ, որ նախագահը եւ սուրիոյ պետութիւնը խոր յարգանք ունին հայ ժողովուրդին նկատմամբ եւ սուրիահպատակ հայերը կը նկատեն հաւատարիմ քաղաքացիներ սուրիական հայրենիքին, հետեւաբար անոնց պաշտպանութիւնը պետութեան աւագ պարտաւորութիւնն է: Ան նաեւ տեղեակ պահեց վեհափառ հայրապետը, որ Լաթաքիոյ նահանգապետը այցելած է եկեղեցւոյ ու դպրոցի սրահները հաստատուած Քեսապի հայութեան ու խոստացած ամէն տեսակ օգնութիւն ընծայել:
Վեհափառը ըսաւ, թէ ինք մտահոգութեամբ կը հետեւի Սուրիոյ անցուդարձերուն եւ ո՛չ միայն Սուրիոյ հայերով, այլեւ ամբողջ Սուրիոյ ժողովուրդին ու Սուրիոյ բոլոր շրջաններու ապահովութեամբ մտահոգ է:
Խօսելով Քեսապի մասին՝ վեհափառը ըսաւ, որ Քեսապը խորհրդանշական իմաստ մը ունի մեր ժողովուրդին համար: Ան յիշեցուց, որ նոյն ցեղասպան Թուրքիան է, որ առիթը կ՛օգտագործէ հարուածելու հայ ժողովուրդը:
Կիրակի առաւօտ, վեհափառ հայրապետը միաբան հայրերէ բաղկացած պատուիրակութիւն մը ուղարկեց Լաթաքիա: Պատուիրակութեան նպատակն է մեր ժողովուրդի զաւակներուն փոխանցել վեհափառ հայրապետին աղօթքներն ու զօրակցութիւնը, տեղեակ դառնալ ստեղծուած կացութեան մասին եւ յատկապէս ուսումնասիրել ժողովուրդին կարիքները, որպէսզի կաթողիկոսարանին կողմէ անհրաժեշտ կարգադրութիւնները կատարուին:
Նաեւ Կիրակի առաւօտ, Մայր տաճարին մէջ վեհափառ հայրապետը պատգամ մը ուղղեց մեր ժողովուրդին: Ան ընդհանուր գիծերով բացատրեց Քեսապի մէջ ստեղծուած կացութիւնը եւ յիշեցուց, որ նոյն ցեղասպան թուրքը 100 տարիներ ետք դարձեալ գաղթական կը դարձնէ մեր ժողովուրդի զաւակները: Ապա վեհափառը շեշտեց, թէ աղօթքի եւ զօրակցութեան ճամբով Մեծի Տանն Կիլիկիոյ կաթողիկոսութիւնը կը մնայ Քեսապի ու ամբողջ Սուրիոյ հայութեան կողքին:
