Գիտակցելով իր ամբողջական պատասխանատուութիւնը կուսակցութեան վերջին շրջանի քաղաքականութեան համար` ՀՅԴ Հայաստանի Գերագոյն մարմինը, կազմակերպութեան Գերագոյն ժողովից առաջ, անհրաժեշտ է համարում հանրութեանը ներկայացնել իր դիրքորոշումները երկրում ստեղծուած նոր իրավիճակի վերաբերեալ:

Այսօր Հայաստանի Հանրապետութիւնը ներքին ու արտաքին բարդագոյն մարտահրաւէրներ է դիմագրաւում: Իշխանութիւնների վարած սոցիալ-տնտեսական քաղաքականութեան հետեւանքով մեր քաղաքացիների գերակշիռ մասը կորցրել է վստահութիւնն ապագայի հանդէպ եւ արմատական բարեփոխումներ է պահանջում: Մեր համոզմամբ` առկայ խնդիրները հնարաւոր է լուծել երկրում համերաշխութեան մթնոլորտ ձեւաւորելու, հասարակական-քաղաքական համախմբում առաջացնելու միջոցով:

ՀՅ Դաշնակցութիւնը ձեւակերպել է համակարգային փոփոխութիւնների, նոր որակի պետութիւն ստեղծելու, արդիւնաւէտ կառավարում ապահովելու իր պատկերացումները, որոնք ամփոփուած են քաղաքական ու տնտեսական առաջադրանքների եօթ կէտանոց փաթեթում: Վստահ ենք` դրանց քայլ առ քայլ, բայց ամբողջական իրականացումը երկիրը դուրս կը բերի ծանրագոյն վիճակից եւ մեր քաղաքացիների համար ազատ ու բարեկեցիկ կեանք կ’երաշխաւորի: Մենք հետեւողականօրէն պահանջելու ենք այդ ծրագրի կենսագործումը` ձգտելով մեր սկզբունքների շուրջ համախմբել հասարակութեան լայն զանգուածներին ու քաղաքական ուժերին:

Այս հանգրուանում ՀՅԴ Հայաստանի Գերագոյն մարմինը որդեգրում է հետեւեալ մօտեցումները.

1.- Մաս չկազմել նոր ձեւաւորուող կառավարութեանը:

2.- Հետեւել իշխանութեան եւ կառավարութեան գործողութիւններին, նրանց հանդէպ մեր վերաբերմունքն ու գործակցութեան ձեւաչափը պայմանաւորել առաջարկուած փաթեթի իրագործման աստիճանով:

3.- Շարունակել գործել ընդդիմադիր դաշտում` մի կողմից ձգտելով հանրութեանն ու քաղաքական ուժերին համախմբել մեր դաւանած ազգային-պետական արժէքների, մեր առաջարկած լուծումների շուրջ, միւս կողմից` փորձելով մեր երկիրը զերծ պահել ցնցումներից ու անկայունութիւնից:

Մեր նպատակը եղել եւ մնում է Հայաստանի պետականութեան հզօրացումը, մեր քաղաքացիների արժանապատիւ, բարեկեցիկ կեանքը:

ՀՅԴ Հայաստանի Գերագոյն մարմինը այս դիրքորոշումները յանձնում է հանրութեանն ու մեկնարկելիք Գերագոյն ժողովին` բնականաբար բոլոր հարցերի վճռահատումը թողնելով հայաստանեան կազմակերպութեան բարձրագոյն ժողովին:

ՀՅԴ Հայաստանի Գերագոյն մարմին
17 ապրիլի 2014թ.

Համակարգային փոփոխութիւններ իրականացնելու
ՀՅ Դաշնակցութեան եօթ առաջարկները
1. Անցում կատարել խորհրդարանի ընտրութեան 100 տոկոս համամասնական սկզբունքի:
ձեւաւորել լիարժէք անկախ ընտրական համակարգ, ստեղծել երաշխիքներ` բացառելու ընտրակեղծիքները, ընտրակաշառքը եւ պետական-վարչական ռեսուրսի օգտագործումը:
2. Անցում կատարել կառավարման խորհրդարանական ժամանակակից համակարգի:
3. Օրէնքով երաշխաւորուած գործուն լծակներ տրամադրել ընդդիմութեանը` ձեւաւորելով իշխանութիւն-ընդդիմութիւն միասնական պետական կառավարման համակարգ: Ստեղծել հակակոռուպցիոն գործակալութիւն, որի ղեկավարի, ինչպէս նաեւ Վերահսկիչ պալատի, Քաղաքացիական ծառայութեան խորհրդի, Տնտեսական մրցակցութեան պաշտպանութեան եւ Հանրային ծառայութիւնը կարգաւորող յանձնաժողովների նախագահների թեկնածուների առաջադրման իրաւունքը վերապահել խորհրդարանական ընդդիմութեանը:
4. Յստակ արտայայտուած կամք դրսեւորել եւ գործուն մեխանիզմներով տարանջատել բիզնեսն ու քաղաքականութիւնը, դատական իշխանութեան լիարժէք անկախութիւնը: Կադրային քաղաքականութեան մէջ առաջնորդուել անձի արհեստավարժութեան եւ հանրային վստահութեան չափանիշներով, պետական կառավարման համակարգում հրաժարուել համատարած կուսակցականացման արատաւոր գործելաոճից:
5. Սոցիալ-տնտեսական քաղաքականութեան հիմքում դնել կենսաապահովման նուազագոյն բիւջէն, միջսերնդային եւ ներսերնդային համերաշխութիւնը: Արմատական փոփոխութեան ենթարկել տնտեսական քաղաքականութիւնը` նպատակ եւ արդիւնաւէտութեան գնահատման չափանիշ դարձնելով տնտեսական զարացումը, նոր աշխատատեղերի ստեղծումը, արժանապատիւ վարձատրութիւնը, աղքատութեան կտրուկ նուազեցումը, միջին խաւի տեսակարար կշռի մեծացումը եւ ատագաղթի կասեցումը:
6. Երկրում արդարութեան ու վստահութեան մթնոլորտ ստեղծելու նպատակով ապահովել արդար բիզնես միջավայր, բացառել քաղաքական շարժառիթներով հասարակական եւ տնտեսական կեանքին միջամտութիւնը, ոչ բնական մենաշնորհները, արտօնութիւններ տալ փոքր ու միջին բիզնեսին, քաղաքացիներին մասնակից դարձնել որոշումների ընդունմանը:
Արագ լուծում տալ լայն հնչեղութիւն ստացած եւ ժողովրդին յուզող հրատապ խնդիրներին (օրինակ` պարտադիր կուտակային վճարներ, արագաչափեր, կարմիր գծեր, տրամսպորտի փոխադրավարձ, ԱՊՊԱՅ սակագին, գիւղատեսութեան վնասներ, փոքր ու միջին բիզնեսի հարկային դրոյքաչափեր եւ այլն):
7. Արտաքին քաղաքականութեան մէջ որդեգրել ազգային-պետական այնպիսի ուղեգիծ, որի գերխնդիրն է հայկական պետականութեան անկախութեան, անվտանգութեան եւ ինքնուրոյնութեան ապահովումը:
Թուրքիայի հետ յարաբերութիւնների կարգաւորումը պէտք է բխի ազգային անվտանգութեան ռազմավարութիւնից` չվտանգելով հայ ժողովրդի նպատակների իրականացման, պատմական արդարութեան վերականգնման հեռանկարը: Ետ կանչել Հայաստանի ստորագրութիւնը հայ-թուրքական արձանագրութիւններից:
Ամրագրել, որ ԼՂՀ հիմնախնդրի լուծման հիմքը Արցախի բնակչութեան համաժողովրդական հանրաքուէներով արդէն իսկ արտայայտուած կամքն է: Բանակցութիւններում ապահովել ԼՂՀ մասնակցութիւնը, կարգավիճակի եւ անվտանգութեան առաջնայնութիւնը: Յարկ եղած դէպքում ԼՂՀ-ի հետ կնքել ռազմաքաղաքական դաշինք: